- Дашкольная адукацыя. Iдэi, Метадычка

Абсталяванне гульнявых пляцовак летам

 

 

Ірына БАЛЬ,
намеснік загадчыка
ясляў-сада № 16 Слоніма

 

Летам большую частку часу дзеці праводзяць на гульнявых пляцоўках. Задача калектыву дашкольнай установыстварыць умовы для разнастайных відаў дзіцячай дзейнасці, узбагаціць сераду элементамі, што стымулююць пазнавальную, эмацыйную, рухальную дзейнасць дзяцей.

Гульнявое абсталяванне на тэрыторыі пляцовак можа быць размешчана ў адвольным парадку, але вялікая яе частка павінна заставацца вольнай для арганізацыі рухомых гульняў, эстафет, забаў.

Вядома ж, гульнявыя пляцоўкі павінны быць аснашчаны вулічным спартыўным і гульнявым абсталяваннем (домікі, сталы, лаўкі, арэлі, ценявыя навесы, веранды), а таксама вынасным спартыўным абсталяваннем (скакалкі, гарадкі, мячы, бадмінтон, абручы, гімнастычныя палкі і інш.).

На участках абавязкова трэба ўсталяваць (прыцямніўшы парансонамі) пясочніцы з вечкам, якое закрываецца, і шырокімі борцікамі, на якія можа прысесці дзіця. Для гульняў з пяском трэба набыць дастатковую колькасць гульнявога матэрыялу. Таксама на пляцоўцы можна размясціць міні-басейн з цацкамі для гульняў з вадой, абсталяваць “Дарожку здароўя” з запоўненымі розным прыродным матэрыялам сектарамі.

У абавязковым парадку на гульнявым участку (лепш, калі гэта будзе цяністая частка ўчастка) неабходна прадугледзець ўстаноўку лёгкіх ценявых навесаў, якія могуць служыць як месцам для індывідуальных гульняў, так і хованкай ад сонца.

Мэтазгодна плошчу ўчастка падзяляць для гульняў дзяцей па інтарэсах. Гэта могуць быць зоны для арганізацыі сюжэтна-ролевых гульняў, зносін дзяцей з кнігай, заняткаў мастацтвам, настольна-друкаваных гульняў, ручной працы, працы з прыродным матэрыялам і г.д.

На ценявых верандах таксама будзе дарэчы абсталяваць куткі для сюжэтна-ролевых гульняў (“Дом”, “Школа”, “Шпіталь”, “Супермаркет” і інш.), для развіваючых гульняў і пазнавальна-практычнай дзейнасці, “Тэатральны куток” – для развіцця маўленчай творчасці і тэатралізаванай дзейнасці.

Для выстаў дзіцячых работ, фатаграфій, сумесных работ дзяцей і іх бацькоў, можна стварыць імправізаваную “карцінную галерэю”. Тут жа размясціць куткі для бацькоў з інфармацыяй пра летні адпачынак дзяцей.

Для фарміравання ў дзяцей цікавасці да вырошчвання раслін і навыкаў догляду за імі, мэтазгодна разбіць міні-агарод, аформіць невялікі кветнік. Кожную градку можна пазначыць шыльдамі з назвай або малюнкам. Для догляду за раслінамі неабходна набыць дзіцячы садовы інвентар.

Важна на тэрыторыі дашкольнай установы аформіць пляцоўку па вывучэнні правілаў дарожнага руху з дарожнай разметкай, пешаходным пераходам, дарожнымі знакамі і святлафорам і выкарыстоўваць яе для правядзення гульняў і заняткаў па навучанні дзяцей бяспечным паводзінам на вуліцах і дарогах.

Варта памятаць, што прадметна-развіццёвае асяроддзе на участках дашкольнай установы – гэта, перш за ўсё, бяспечнае асяроддзе, максімальна псіхалагічна камфортнае для кожнага дзіцяці. Яно задавальняе яго патрэбы ў вольным выбары віду дзейнасці, ступені ўдзелу ў ёй, спосабаў яе ажыццяўлення і ўзаемадзеяння з аднагодкамі.

 

Поделиться ссылкой:

Пакінуць адказ