- МАГІЛЁЎШЧЫНА, Рэгiёны

Настрой задае “Камертон”

 

Нацыянальны дзіцячы адукацыйна-аздараўленчы цэнтр “Зубраня” надоечы ў чарговы раз прымаў 150 перспектыўных юных журналістаў, удзельнікаў змены “Прэс-перспектыва”.

Усе ўдзельнікі прайшлі сур’ёзны адборачны этап конкурсу дзіцячых сродкаў масавай інфармацыі “Свежы вецер”, каб сустрэцца разам, даведацца пра нешта новае, падзяліцца сваім вопытам і ведамі і, вядома ж, выйграць. Дваццаць адзін дзень змены, пяць буйных конкурсаў, незлічоная колькасць заданняў па стварэнні матэрыялаў для газет і часопісаў, тысячы незабыўных момантаў – усім гэтым жылі ўдзельнікі змены “Прэс-перспектыва”.

Не ў першы раз у конкурсе, заваёўваючы перамогі ў розных намінацыях, удзельнічаў і “Камертон” – газета Магілёўскай дзяржаўнай гімназіі-каледжа мастацтваў імя Яўгена Глебава. Сёлета наша газета заняла ў конкурсе трэцяе месца і была ўдастоена адпаведнага прызавога дыплома. Такі вердыкт вынесла прафесійнае журы, у склад якога ўвайшлі карэспандэнт рэдакцыі газеты “Пераходны ўзрост” Кацярына Каваленка, карэспандэнт рэдакцыі газеты “Нарачанская зара” Юліяна Сурганава, галоўны рэдактар газеты “Зорка” Аляксандра Джажора.

У нашай навучальнай установе ідэя стварыць сваю газету нарадзілася ў 2010 годзе. Сёння да выпуску гатовы ўжо 85 нумар выдання. Выходзіць газета штомесяц, яе аб’ём – 10 старонак. “Камертон” задуманы і створаны творчым супрацоўніцтвам педагогаў і навучэнцаў, з’яўляецца спосабам самавыяўлення тых, каму ёсць што сказаць. У газеце асвятляюцца розныя тэмы. Мы публікуем артыкулы пра дасягненні вучняў і педагогаў, творчыя партрэты цікавых людзей гімназіі-каледжа, расказваем пра навіны і мерапрыемствы, якія ў нас праходзяць, знаёмім з вынікамі апытанняў рознай тэматыкі, разважаем на маральныя тэмы.

Змест газеты – гэта школьнае жыццё ў самым шырокім сэнсе: кола інтарэсаў рабят, іх клопаты і пошукі, агульныя радасці, сумненні і адкрыцці. “Камертон” – своеасаблівы летапіс навучальнай установы.

У гімназіі-каледжы шмат творчых навучэнцаў, якія не толькі граюць на музычных інструментах і з’яўляюцца лаўрэатамі творчых конкурсаў рознага ўзроўню, але і пішуць вершы, апавяданні, выдатна малююць. Наша рэдкалегія яшчэ вельмі маладая, не заўсёды ўсё атрымліваецца так, як хочацца. Мы разумеем, што многае ў выданні яшчэ мае патрэбу ў дапрацоўцы, удасканаленні. Аднак цяжкасці нас не палохаюць, і той факт, што газета становіцца ўсё больш папулярнай, стымулюе ўсіх юных журналістаў гімназіі-каледжа да больш стабільнай, творчай і сур’ёзнай працы. Мы шчыра верым, што ў гімназічнай газеты “Камертон” ёсць будучыня, якая залежыць толькі ад нас!

Наталля КУРЫЛА,
намеснік дырэктара па выхаваўчай рабоце
Магілёўскай дзяржаўнай гімназіі-каледжа
мастацтваў імя Я.Глебава

 

Поделиться ссылкой:

Добавить комментарий