- ГРОДЗЕНШЧЫНА, Рэгiёны

Зімовае падарожжа дашкалят

 

У санаторнай другой малодшай групе № 1 ясляў-сада № 12 Навагрудка прайшоў тэматычны тыдзень “Зіма. Сезонныя змены ў прыродзе”. З выхаванцамі групы было праведзена шмат займальных заняткаў.

Больш за ўсіх наступу зімы, як правіла, радуюцца дзеці. І не выпадкова, бо менавіта зіма дае выдатную магчымасць весела і з карысцю для здароўя праводзіць час на свежым зімовым паветры.

Дзеці размаўлялі пра зіму і зімовыя забавы, знаёміліся з асаблівасцямі зімовай прыроды, разглядалі карціны, слайды, слухалі творы мастацкай літаратуры “Зайкава хатка”, “Зіма”. Займаліся выяўленчай дзейнасцю: лепкай “Лясная прыгажуня”, маляваннем “Вясёлы снегавік”, гулялі ў розныя дыдактычныя гульні “Складзі елачку”, “Зімачка-зіма” і іншыя, а таксама выяўлялі ўласцівасці прыродных матэрыялаў у працэсе эксперыментавання (снег белы, лепіцца, растае; лёд цвёрды, слізкі і інш.).

Вынікам тэматычнага тыдня стала мэтавая прагулка на свой участак, дзе выхаванцы змаглі ўдакладніць прадстаўленне пра зіму (снег ляжыць на зямлі, на дахах, на дрэвах, кустах; холадна, дзеці і дарослыя цёпла апранутыя і г.д.), а таксама заняцца працоўнай дзейнасцю – расчысціць дарожкі ад снегу і счысціць яго з лавак.

Тыдзень прайшоў вельмі займальна і цікава. Выхаванцы групы не толькі атрымалі шмат новых ведаў пра зіму, але і зарадзіліся станоўчай энергіяй і аптымізмам на ўвесь год.

Таццяна БАБАЧУК,
выхавальнік
ясляў-сада № 12 Навагрудка

 

Поделиться ссылкой:

0

Добавить комментарий