У рамках рэгіянальнага праекта “#Эканоміка. Асоба. Будучыня” вучні 8–9-х класаў сярэдняй школы № 11 Ліды наведалі ААТ “Лідскія харчовыя канцэнтраты” для знаёмства з прафесіямі, запатрабаванымі на вытворчасці.
Сёння прадпрыемства выпускае больш за 150 найменняў рознай прадукцыі пад гандлёвымі маркамі “Лідкон”, “Лідскія прыправы”, “Tvitnik” і, вядома ж, “Хрумсцік”.
Школьнікі пазнаёміліся з гісторыяй завода, наведаўшы музей прадпрыемства. Вытворчасць яны змаглі ўласна ўбачыць, калі зазірнулі ў самы салодкі цэх, дзе вырабляюць любімы ўсімі дзецьмі ласунак “Хрумсцік”. Ванільныя і шакаладныя, лімонныя і мятныя, са згушчаным малаком і проста салодкія, глазураваныя і паветраныя… Пра кукурузныя палачкі вучні слухалі з асаблівай цікавасцю і адначасова назіралі, як яны вырабляюцца. Пасля знаёмства з вытворчасцю кожны наведвальнік змог пачаставацца кукурузнымі палачкамі на розны густ.
Першапачаткова ж мэта наведвання вытворчасці тычылася знаёмства з прафесіямі, якія запатрабаваныя на прадпрыемстве сёння. Як упэўніліся падлеткі, прафесіі тут і цікавыя, і вельмі адказныя. Магчыма, для кагосьці з сённяшніх школьнікаў гэтая экскурсія стане вызначальнай, і ў будучыні лідскае прадпрыемства стане іх месцам працы.
Наталля АНАШКЕВІЧ,
класны кіраўнік 8 “Б” класа
сярэдняй школы № 11 Ліды