У Бабруйску ідзе будаўніцтва новага дзіцячага садка. Дашкольная ўстанова будзе разлічана на 13 груп.
У іх ліку – спецыяльная і санаторная групы. Ва ўстанове створаць поўнасцю безбар’ернае асяроддзе, усталююць ліфт. Гэта дасць магчымасць атрымання дашкольнай адукацыі дзецям з парушэннямі апорна-рухальнага апарата. У матэрыяльным плане ў новым садку арганізуюць усе ўмовы для паўнацэннага развіцця дзяцей. Тут будуць працаваць музычная, спартыўная, гімнастычныя залы, кабінеты для заняткаў па бяспецы жыццядзейнасці, педагога-псіхолага, настаўніка-дэфектолага і метадычны.
– Кожная група будзе абсталявана неабходнай мэбляй, мяккім інвентаром, цацкамі, тэлевізарамі, стацыянарнымі і перасоўнымі дошкамі. Прадугледжаны таксама рэсурсныя цэнтры для захоўвання метадычнай літаратуры і наглядных дапаможнікаў. Для ўмацавання здароўя дзяцей у новым садку будуць функцыянаваць сучасны медыцынскі блок і басейн, –паведаміла начальнік упраўлення па адукацыі Бабруйскага гарвыканкама А.С.Лісіца.
Значна, што новы дзіцячы садок узводзяць у маладым гарадскім мікрараёне “Маладзёжны”. Увод яго ў эксплуатацыю дазволіць вырашыць тут праблему з крокавай даступнасцю дашкольных устаноў.
Ганна СІНЬКЕВІЧ
Фота з архіва аўтара