У рамках тэматычнага тыдня выхаванцы спецыяльнай групы для дзяцей з цяжкімі парушэннямі маўлення “Зорачка” ясляў-сада № 34 Ліды акунуліся ў чароўны свет казкі.
Беларускія народныя казкі павучальныя, адрозніваюцца простай мовай, фарміруюць станоўчыя рысы характару і паводзін, а драматызацыя казак дазваляе раскрыць творчыя здольнасці дашкалят, выказаць свае пачуцці, перажыванні, эмоцыі.
Так, інсцэніроўка вядомай казкі “Курачка-рабка” атрымалася цікавай і займальнай. Выхавальнік пазнаёміла дзяцей з рознымі відамі тэатра, расказала пра глядзельную залу тэатра, сцэну, для чаго патрэбна ў тэатры заслона і пра тое, што, каб наведаць спектакль, неабходна купіць квіткі. Даведаліся дашкольнікі таксама і пра правілы паводзін у тэатры: гледачы рассаджваюцца строга па сваіх месцах, у тэатры нельга размаўляць і шумець падчас прадстаўлення.
У ходзе падрыхтоўкі і непасрэдна падчас тэатралізаванага прадстаўлення юныя акцёры стараліся адлюстраваць казачныя вобразы, перадаць выразнасць рухаў, інтанацыю. Дзецям прапаноўваліся цацкі, пальчыкавы тэатр, тэатр на ліпучках, тэатр бі-ба-бо. Выхаванцы змаглі прадэманстраваць не толькі веданне казкі, але і свае артыстычныя здольнасці. А завяршылі мерапрыемства апладысменты і словы падзякі артыстам ад маленькіх гледачоў.
Лялечны спектакль прынёс дзецям шмат радасці і задавальнення.
Ірына КЛІМОВІЧ,
выхавальнік дашкольнай адукацыі
ясляў-сада № 34 Ліды
Предложить публикацию