Вучні паўтораць фармуліроўкі прымет роўнасці трохвугольнікаў; будуць фарміраваць ўменні распазнаваць роўныя трохвугольнікі, даказваць іх роўнасць, рабіць высновы аб роўнасці некаторых элементаў трохвугольнікаў і замацуюць веды рашэннем задач па тэме.
Ірына РАДЗЮК,
настаўнік матэматыкі
ДУА “Уселюбская сярэдняя школа”
Навагрудскага раёна,
Гродзенская вобласць
Мэты ўрока:
адукацыйныя
– паўтарэнне фармуліровак прымет роўнасці трохвугольнікаў;
– фарміраванне ўменняў распазнаваць роўныя трохвугольнікі, даказваць іх роўнасць, рабіць высновы аб роўнасці некаторых элементаў трохвугольнікаў;
– выпрацоўка навыкаў рашэння задач па тэме.
выхаваўчыя
– выхаванне акуратнасці і стараннасці;
– прывіццё станоўчага стаўлення да ведаў, да працэсу навучання;
– фарміраванне самастойнасці і ўмення рабіць самаацэнку.
развіваючыя
– развіваць творчыя здольнасці, пазнавальную актыўнасць, уменне рашаць задачы па гатовых чарцяжах, лагічнае мысленне, вучыць вырашэнню праблемы, часткова-пошукавай дзейнасці;
– развіваць увагу, слыхавую і зрокавую памяць, правільную матэматычную мову вучняў.
Тып урока: урок прымянення ведаў і ўменняў.
Метады: тлумачальна-ілюстрацыйны, даследчы, рэпрадуктыўны.
Формы: славесная, наглядная, практычная.
Метадычнае забеспячэнне ўрока: камп’ютары, мультыборд, карткі з тэстамі на веданне прымет роўнасці трохвугольнікаў, карткі з заданнямі для працы на ўроку, матэрыял для практычнай работы, прэзентацыя да ўрока.
Ход урока
1 Арганізацыйны момант
Праверка гатоўнасці вучняў да ўрока. Эмацыянальны настрой вучняў.
– На сталах у кожнага з вас ляжаць лісты самакантролю і каляровыя сцікеры. Мы будзем працаваць з імі на працягу ўсяго ўрока. Калі вы выканалі заданне правільна, то супраць яго прыклейваеце сцікер зялёнага колеру, калі справіліся з паловай або большай паловай задання – аранжавы, калі менш паловы – чырвоны.
2 Актуалізацыя ведаў
Каб даведацца, ці свядома вучні засвоілі тэарэтычны матэрыял, ім прапаноўваецца адказаць на пытанні з элементамі новага або знайсці памылку.
“Простае пытанне”. З якіх простых геаметрычных фігур складаецца трохвугольнік?
“Сляпое пытанне” (вучань стаіць спінай да дошкі). На малюнку пабудаваны тры пункты, злучаныя адрэзкамі (пункты ляжаць на адной прамой). Ці правільна, што на дошцы пабудаваны трохвугольнік?
“Знайдзі памылку”. У трохвугольніку супраць роўных вуглоў ляжаць роўныя стораны.
“Складанае пытанне”. Пры накладанні двух роўных трохвугольнікаў адпаведна сумясціліся дзве пары вяршынь і стораны, заключаныя паміж імі. Ці правільна, што абавязкова сумесцяцца ўсе астатнія элементы трохвугольніка?
“Зрабі вывад”. Які вывад можна зрабіць з выказвання – два трохвугольнікі роўныя?
“Практычнае пытанне”. Чаму амаль усе стрэхі дамоў у аграгарадку Уселюб двухсхільныя? (Уласцівасць устойлівасці).
3 Вусная праца (паўтарэнне тэарэм)
Ілюстрацыю якой прыметы роўнасці трохвугольнікаў вы бачыце на чарцяжы?
4 Тэст “Правільна – няправільна”
Вучням даецца час (3 мін.) на выкананне задання, а затым франтальная праверка.
– Калі вы згодныя са сцвярджэннем ставіце “+”, калі не, ставіце “–”. Не забывайце ацэньваць вашы адказы.
|
№ |
Сцвярджэнне |
+/– |
|
1 |
Калі ў трохвугольніку дзве стараны роўныя, то трохвугольнік называецца раўнабедраны. |
+ |
|
2 |
Адрэзак, які злучае вяршыню трохвугольніка з процілеглай стараной, называецца медыянай трохвугольніка. |
– |
|
3 |
Калі тры стараны аднаго трохвугольніка адпаведна роўныя тром старанам другога трохвугольніка, то такія трохвугольнікі роўныя. |
+ |
|
4 |
Калі старана і два вуглы аднаго трохвугольніка адпаведна роўныя старане і двум вуглам другога трохвугольніка, то такія трохвугольнікі роўныя. |
– |
|
5 |
Калі дзве стараны і вугал паміж імі аднаго трохвугольніка адпаведна роўныя двум старанам і вуглу паміж імі другога трохвугольніка, то такія трохвугольнікі роўныя. |
+ |
|
6 |
У трохвугольніку вуглы пры аснове роўныя. |
– |
|
7 |
Бісектрыса раўнабедранага трохвугольніка, праведзеная да асновы, з’яўляецца медыянай і вышынёй. |
+ |
|
8 |
Калі тры вуглы аднаго трохвугольніка адпаведна роўныя тром вуглам другога трохвугольніка, то такія трохвугольнікі роўныя. |
– |
Калі ёсць неабходнасць, звярніцеся да падручніка.
5 Рашэнне задач па гатовых чарцяжах
«Калі ведаеш – дакажы» (вусная работа с класам).
– У геаметрыі вельмі важна ўмець глядзець і бачыць, заўважаць і адзначаць розныя асаблівасці геаметрычных фігур. Ваша задача – па гатовым чарцяжы даказаць роўнасць трохвугольнікаў.
6 Рашэнне задач у групах
Першая група рашае задачу № 1, а другая група – Задачу № 2. Задача № 1 уваходзіць у рашэнне задачы № 2. Таму на дошцы пры разгляданні другой задачы чарцяжы патрэбна сумясціць.
Задача № 1.
Дадзена: МО = ОN, вугал М роўны вуглу N.
Даказаць: ∆ВОС – раўнабедраны.
Задача № 2.
Дадзена: МО = ОN, АМ = DN, АВ = СD, <ВМО = <СNО.
Даказаць: ∆АВМ = ∆DСN
7 Фізкультмінутка
У класе на сценах размешчаны розныя віды трохвугольнікаў. Настаўнік называе трохвугольнік (напрыклад, прамавугольны), а вучні паварочваюць галаву ў бок гэтага трохвугольніка. Практыкаванне выконваецца стоячы.
8 Лабараторная практычная работа (у парах)
– Уявіце, што ў вашага любімага фотаздымка, які вы беражліва захоўваеце, адкалоўся вугалок. У вас ёсць кавалак шкла, з якога можна выразаць вугалок, каб выканаць замену. Якія вымярэнні вам трэба зрабіць, каб выканаць заданне? (У кожнай пары ёсць “адбіты вугалок” – выразаны з ліста паперы і ліст кардону для “рэстаўрацыі“). Вучні абмяркоўваюць алгарытм дзеянняў, выконваюць заданне і дэманструюць мадэлі.
9 Практычная работа
Для выканання работы выкарыстоўваецца сэрвіс https://school-assistant.ru/?class=geometr “Школьный помощник”, Геометрия, 7-й класс.
Тэма “Прыметы роўнасці трохвугольнікаў”. З 6 заданняў вучні выбіраюць два ў залежнасці ад ступені засваення тэмы. (Колер, які пераважае ў лістку самакантролю, дапамагае зрабіць выбар заданняў. Калі пераважае чырвоны колер, то выбіраюцца заданні 1 і 2, калі зялёны, то заданні 5 і 6, астатнія – 3 і 4 заданні.)
10 Падвядзенне вынікаў урока. Рэфлексія (састаўленне сінквейна)
___ ___________(назоўнік – галоўная тэма)
______________(два прыметнікі – галоўная думка)
______________(тры дзеясловы – дзеянні ў межах тэмы)
___________________(фраза з сэнсам)
___________________(заключэнне – назоўнік – асацыяцыя з першым словам).
11 Дамашняе заданне
№ 70, № 104, закончыць працу над праектам “Трохвугольнікі вакол нас”.
Предложить публикацию