×

Падарожжа ў свет прафесій

19.03.2020 15:59,

Кожны з нас ведае, наколькі важна знайсці сваё месца ў жыцці, займацца справай, якая па душы, самасцвердзіцца.

Усе дзеці надзелены пэўнымі здольнасцямі, схільныя да вывучэння пэўных прадметаў, што можа стаць асновай будучай прафесіі. Сёння многія падлеткі прымаюць рашэнне аб выбары будучай прафесіі па рэкамендацыі бацькоў, сяброў, настаўнікаў.

Кім быць? Дадзеная праблема заўсёды стаяла перад маладымі людзьмі. У цяперашні час з хутка зменлівым рынкам працы гэтая праблема становіцца асабліва актуальнай. Моладзь не ў поўнай меры валодае інфармацыяй аб запатрабаваных прафесіях свайго горада. Традыцыйныя прафесіі перажываюць змены, што патрабуе ўмення хутка перабудавацца, мабілізавацца, каб быць патрэбным і паспяховым.

Знаёмства з прафесіямі неабходна пачынаць ужо ў малодшым школьным узросце, пачынаючы з блізкага асяроддзя, з прафесій бацькоў і людзей добра знаёмых, чыю працу дзеці назіраюць з дня ў дзень. Дапамагае ў гэтым метапрадметны метад – адукацыйнае падарожжа. У тэхналагічным плане адукацыйнае падарожжа ўяўляе даследчую і праектную дзейнасць навучэнцаў. Дзеці самастойна вывучаюць і адбіраюць інфармацыю, працуюць з тэкстамі, аналізуюць, пашыраюць свой кругагляд, робяць выснову. У адукацыйным падарожжы праца арганізоўваецца ў малых групах, што дазваляе кожнаму ўдзельніку выказваць уласныя версіі і карэктаваць іх на аснове калектыўнага абмеркавання. У працу ўключаны спецыялісты розных прафесій, бацькі. Гэта вельмі актуальна для сённяшняй адукацыі, бо новыя стандарты нацэльваюць на сацыяльнае партнёрства школы з іншымі ўстановамі і супольнасцямі.

Навучэнцам трэцяга класа я прапанавала правесці адукацыйнае падарожжа «У свеце прафесій роднага горада». На першым этапе падрыхтоўкі прапаноўваліся ідэі, фармулявалася праблемнае пытанне, выбіралася тэма маршруту, вызначалася мэта, задачы і час знаходжання ў дарозе. У выніку былі створаны тры групы «падарожнікаў», размеркаваныя ролі ў групе, дадзена заданне кожнаму ўдзельніку.

На другім этапе кожная група працавала на маршруце. Група «Рамеснікі» наведала Дом рамёстваў Мсціслаўскага раёна. Дзеці пазнаёміліся з «забытымі» прафесіямі ганчара і ткачыхі. Даследавалі прафесіі па плане, паўдзельнічалі ў майстар-класах. Прадуктам групы стаў выраблены навучэнцамі посуд з гліны, бюлетэнь «Забытыя прафесіі», інсцэніроўка па прафесіі ткача. Група «Прафесіяналы» наведала Раённы аддзел па надзвычайных сітуацыях і Мсціслаўскі філіял ААТ «Булачна-кандытарскай кампаніі «Дамачай». Даследаваўшы прафесіі на месцах, дзеці напісалі сачыненні і сінквейны, намалявалі малюнкі, стварылі адпаведныя вырабы. Група «Спецыялісты» наведала Мсціслаўскі дзяржаўны будаўнічы каледж, дзе даследавала будаўнічыя прафесіі, паўдзельнічала ў майстар-класах, знайшла адказы на пастаўленыя пытанні. Навучэнцы выпусцілі рэкламныя лісткі, падабралі гульні, загадкі і прыказкі аб будаўнічых прафесіях.

У працэсе працы над адукацыйным падарожжам усе групы звярталіся да рэсурсных картаў, у якіх паказвалася, дзе можна знайсці патрэбную інфармацыю і да каго звярнуцца па дапамогу.

На трэцім этапе ўдзельнікі груп выказвалі сваю думку, грунтуючыся на тых фактах, з якімі яны пазнаёміліся падчас падарожжа, і тых адчуваннях, якія яны выпрабавалі. Дзеці адказвалі на пытанні, пазначаныя ў маршрутным лісце, выказвалі свой погляд на праблему, якая вырашалася падчас падарожжа, і аргументавалі ўласны пункт гледжання з дапамогай вынікаў сваіх даследаванняў. Яны пашырылі веды аб прафесіях, праявілі паважлівае стаўленне да працы, развілі камунікатыўныя агульнавучэбныя ўменні, набылі новыя веды па прадмеце «Чалавек і свет», рускай мове, літаратурным чытанні, выяўленчым мастацтве, працоўным навучанні. Яны зрабілі выснову, што свет прафесій роднага горада вельмі разнастайны і неабходна праяўляць паважлівае стаўленне да чужой і сваёй працы.

Наталля ЧЫЖ,
настаўнік пачатковых класаў сярэдняй
школы 2 Мсціслава.