×

Маленькія шахматысты

11.01.2020 11:47,

Шахматы — папулярны від спорту, якім захапляюцца мільёны людзей ва ўсіх кутках планеты, цудоўны трэнажор для мозга, які значна павялічвае інтэлектуальныя здольнасці. Шахматы могуць быць адным са сродкаў развіцця інтэлекту дзіцяці ў дашкольным узросце. Працэс навучання шахматам спрыяе канцэнтрацыі ўвагі, развівае лагічнае мысленне, умацоўвае памяць, развівае вынаходлівасць. Таму так важна вучыць малышоў гульні ў шахматы ў дашкольным узросце.

У яслях-садзе № 3 аг.Лясны шахматамі дзеці займаюцца ў групе па інтарэсах “Шахматы для малышоў”. Заняткі праводзяцца 2 разы на тыдзень у невялікіх групах да 7 чалавек.

Працягласць заняткаў: 25—30 мінут. План кожных заняткаў распісаны памінутна. Пачынаюцца заняткі з паўтарэння пройдзенага матэрыялу, потым новы матэрыял і практычныя заданні і гульні, у канцы заўсёды падводзіцца вынік, дзеці дзеляцца сваімі ўражаннямі.

У час заняткаў дзеці працу­юць калектыўна, у парах і індывідуальна ля дэманстрацыйнай дошкі і за сваімі дошкамі. У рабоце выкарыстоўваецца шмат дадатковага гульнявога і дыдактычнага матэрыялу. Практычна на кожных занятках педагог дае невялікае заданне на замацаванне вывучанага матэрыялу дадому.

Матэрыял у дамашніх заданнях падзелены на тэарэтычную і практычную частку. Бацькі дома з дзецьмі паўтараюць тэорыю, а потым замацоўваюць яе рашэннем практычных задач.

Для дзяцей, якія добра гуляюць (другі год навучання), праводзяцца цалкам практычныя заняткі: дзеці гуляюць, запісваюць партыі, потым  аналізуюць іх разам з кіраўніком. Таксама для падтрымання цікавасці да шахмат у нас у садзе праводзіўся шахматны турнір “Шахматёнок”.

Да канца першага года навучання дзеці ўжо ведаюць правілы і мэту гульні, асноўныя шахматныя тэрміны, хады і ўзяцце фігур, каштоў­насць фігур, тры абароны ад шаха, самыя простыя спосабы матавання, маюць першасныя веды па пачатку партыі. Таксама яны ўмеюць чытаць шахматную натацыю, прадугадваць правільныя ўзяцці фігур, звязаныя з разменам, правільна абараняць караля ад пагроз, складаць найпрасцейшы план дзеянняў у гульні, ставіць мат у адзін ход.

Да канца другога года навучання дзеці ведаюць, што такое дэбют, мітальшпіль, эндшпіль, тры ракіроўкі, спосабы напа­дзення і абароны, правілы шахматных паводзін. Яны ўмеюць ставіць мат ферзём і ладдзёй, дзвюма ладдзямі.

Шахматы не толькі развіваюць інтэлект. Дзякуючы гэтай гульні, дзеці вучацца быць цярплівымі, уседлівымі, настойлівымі ў дасягненні пастаўленай мэты, выпрацоўваюць у сябе працаздольнасць, уменне рашаць лагічныя задачы ва ўмовах дэфіцыту часу, трэніруюць памяць. А самае галоўнае, шахматы — гэта творчы працэс, які прымушае дзяцей расці, развівацца!

Не кожнае дзіця здольна ­стаць чэмпіёнам. Але навучанне дзіцяці шахматам з ранняга ўзросту з’яўляецца выдатнай да­школьнай падрыхтоўкай і перадумовай добрага навучання ў школе.

Лілія КАРОЛІК,
выхавальніца ясляў-сада № 3 аг.Лясны Мінскага раёна.