×

Гімназісткі ва ўсім ззянні

26.12.2019 15:56,

Прыгожая і відовішчная падзея адыходзячага года адбылася ў гімназіі № 56 Мінска. У навагодні вечар перад канкурсанткамі — 9 самымі прывабнымі гімназісткамі — стаяла нялёгкая задача: заваяваць сэрцы гледачоў талентам, абаяннем і крэатывам. Перад журы ж задача — выбраць тую, якая будзе вартая тытула “Міс Ззянне”.

Конкурс складаўся з пяці дэфіле з элементамі харэаграфіі, якія праходзілі пад сучасныя хіты (іх выконвалі ўжывую выпускнікі гімназіі Уладзіслаў Лужынскі і Караліна Лапко, а таксама арганізатар і рэжысёр-пастаноўшчык шоу-праграмы Таццяна Сцепаненка). Кожны раз дзяўчаты выходзілі на сцэну ў новым вобразе.

 Таксама удзельніц чакалі тры этапы заданняў: візітоўка “Усе грані майго “Я”, навагодняе відэавіншаванне “З Новым годам, краіна!”, творчы конкурс “Усе грані майго таленту”. Канкурсанткі бліскуча спраўляліся з усімі задачамі і не стамляліся здзіўляць гледачоў.

Навагодні вечар меў лёгкую атмасферу з ноткамі гумару з вуснаў вядучых — навучэнцаў гімназіі Андрэя Макейчыка і Яўгена Івуса; прадстаўніцы ад Беларусі на конкурсе “Еўрабачанне” ў Польшчы Лізы Міснікавай, студэнта БДАМ выпускніка гімназіі Улада Лужынскага.

Шоу-праграма суправаджалася творчымі нумарамі гімназістаў, а таксама запрошаных гасцей: тэатра танца “Чарлі”, студыі эстраднага танца “Сапфір”, цыркавой студыі Палаца чыгуначнікаў, клуба па спартыўных бальных танцах “Дыямант”. Кульмінацыяй вечара стала крэатыўная праграма ад Снягуркі і сучаснага Дзеда Мароза і піксельные шоу, што не мае аналагаў у Беларусі.

Па выніках мерапрыемства ўсім пераможцам былі ўручаны аўтарскія дыпломы, распрацаваныя навучэнцам гімназіі Ягорам Шпакоўскім. А галоўны тытул “Міс Ззянне — 2019” прысуджаны Аляксандры Верчанкавай!

Завяршэннем вечара стала “Snow party-danсe”. А зрабіць яго насычаным і незабыўным атрымалася дзякуючы падтрымцы дырэктара гімназіі Русланы Віктараўны Лешчанка, якая заахвочвае творчых і крэатыўных навучэнцаў у любых пачынаннях!

Кацярына ШЫЎРЫНА,
намеснік дырэктара па вучэбнай рабоце гімназіі № 56 Мінска.