×

Сям’я – перазагрузка

11.01.2020 11:34,

Што адбываецца з сучаснай сям’ёй? “Урокі зрабіў? Паеў?” — пара дзяжурных пытанняў і некалькі слоў у адказ: “Нам не задавалі. Ай, ма!” Бадай гэта ўсё, на чым трымаюцца сёння адносіны паміж бацькамі і дзецьмі. Змяніць сітуацыю вырашылі ў сталічнай школе № 43 і стварылі клуб “Сям’я — перазагрузка”.

Аўтарам праекта выступіла педагог-арганізатар cярэдняй школы № 43 Мінс­ка Зоя Тадэвушаўна Бан­дзік. Тэму сваёй распрацоўкі яна пазначыла так: “Выкарыстанне выхаваўчага асяроддзя шостага школьнага дня для папаўнення рэсурсаў сучаснай сям’і з дапамогай работы клуба “Сям’я — перазагрузка”. Актуальнасць праблемы Зоя Тадэвушаўна лічыць відавочнай:

— Сям’я была, ёсць і, вельмі хочацца верыць, назаўсёды застанецца самым важным у жыцці кожнага чалавека. Але ў сучасным свеце з яго шалёным рытмам губляюцца паўната і насычанасць унутрысямейных узаемаадносін, якія былі раней. Сёння востра стаіць праблема адсутнасці цеснага эмацыянальнага, духоўнага кантакту ўнутры сям’і. Часта бацькі і дзеці не знаходзяць паразумення з-за рознасці інтарэсаў.

Аднак змяніць сітуацыю можна: сфера зносін пашыраецца, а іх якасць паляпшаецца, калі з’яўляецца сумесная дзейнасць. Напрыклад, паход у тэатр, кіно. Але ці часта гэта здараецца? Як зрабіць, каб у бацькоў і дзяцей стала больш падстаў разам тварыць, размаўляць, пазнаваць нешта новае, нават адно пра аднаго? Дзе знайсці час, месца, рэсурсы, якія дапамаглі б сям’і “перазагрузіцца”, выйсці на новы ўзровень узаемаадносін, узаемаразумення? Разважаючы над гэтымі пытаннямі, Зоя Тадэвушаўна згадвае пра дзіцячы садок:

— У той перыяд мамы і таты з задавальненнем гуляюць з малымі, майструюць, абмяркоўваюць сумесныя ідэі. Але ў школе цеснае творчае супрацоўніцтва зводзіцца да эпізодаў, калі неабходна падрыхтавацца да якога-небудзь конкурсу. Тады дзеці і бацькі на кароткі тэрмін аб’ядноўваюцца, пачына­юць жыць агульнымі эмоцыямі. Але праект заканчваецца, і цеплыня, натхненне, якія ахутвалі іх будні, зноў сыходзяць да руціны.

Вось і вырашылі ў сярэдняй школе № 43 Мінска аптыміза­ваць формы і метады правя­дзення мерапрыемстваў — стварыць новую мадэль шостага школьнага дня, каб яна ўтрымлівала скаардынаваныя і мэтанакіраваныя дзеянні на пашырэнне сфер унутрысямейных зносін і духоўнае збліжэнне яе членаў.

Педагог-арганізатар прапанавала аб’яднаць мера­прыемствы шостага школьнага дня ў адзіную лінію, дзе кожная сям’я зможа знайсці сабе тэму па душы, прастор для творчасці з дапамогай дзейнасці клуба “Сям’я — перазагрузка”.

Разуменне пазначанай праблемы і магчымасцей існуючай матэрыяльна-тэхнічнай базы ўстановы адукацыі (музычна-харэаграфічная накіраванасць школы) прывяло да распрацоўкі інавацыйнай мадэлі арганізацыі выхаваўчага працэсу — клуба шостага школьнага дня “Сям’я — перазагрузка”, дзейнасць якога мае практыка-арыентаваны характар у кантэксце эмацыянальнага, творчага, духоўнага аб’яднання членаў сям’і розных пакаленняў і грунтуецца на ўзаемадзеянні ўсіх удзельнікаў выхаваўчага працэсу: бацькоў, педагогаў школы, навучэнцаў.

На які вынік плануе выйсці аўтар праекта? У першую чаргу, на пашырэнне сфер зносін і збліжэнне розных пакаленняў. Разлічвае таксама назапасіць метадычны вопыт, накіраваны на згуртаванне сям’і. Спадзяецца і на папулярызацыю самога клуба як адпачынкавага цэнтра выхаднога дня.

Сумнявацца ў дасягненні заяўленых мэт не даводзіцца: сярод асноўных відаў рэсурсаў тут пазначаны інтэлектуальны. А гэта кіраўніцтва школы — дырэктар Юлія Уладзіміраўна Дзяржыцкая, намеснік дырэктара па выхаваўчай рабоце Святлана Сямёнаўна Лазоўская, а таксама педагог-арганізатар Зоя Тадэвушаўна Бандзік, педагог-псіхолаг Настасся Мікалаеўна Кавалёнак і педагог сацыяльны Наталля Аляксееўна Фядзярына.

Сёння праект знаходзіцца на стадыі апрабацыі. На працягу бягучага 2019/2020 навучальнага года ў адпаведнасці з планам яго рэалізацыі  ладзяцца розныя творчыя мерапрыемствы і вылучаюцца самыя эфектыўныя.  Пад дзеянне клуба ў першую чаргу трапляюць сем’і навучэнцаў пачатковай школы, бо часта менавіта пасля яе заканчэння кантакт паміж дзецьмі і бацькамі паступова скарачаецца, у тым ліку па прычыне псіхалагічных асаблівасцей падлеткавага ўзросту.

 Так, напярэдадні зімовых канікул прайшло чарговае пасяджэнне клуба “Сям’я — перазагрузка”. Тэма — Новы год. Бацькі з дзецьмі дзяліліся ўспамінамі пра  ранішнікі, згадвалі сямейныя традыцыі. Адны расказвалі, як збіраюцца ў вёсцы, воддаль ад гарадской мітусні. Другія прынеслі этнічны касцюм, у якім калядавалі на беразе Індыйскага акіяна. Асаблівую цікавасць выклікалі цацкі, якія перадаюцца з пакалення ў пакаленне. Мамы і таты з настальгіяй згадвалі, як калісьці ўпрыгожвалі ёлку. А дзеці са здзіўленнем разглядалі “шкельцы”, не разумеючы, чаму тыя выклікаюць у дарослых радасць. Абмеркавалі і школьныя святы. Бацькі ўспаміналі, як самі аздаблялі клас, як рыхтаваліся да маскараду, якія ролі выконвалі. Пагаварыўшы, падмацавалі словы справамі: дружна майстравалі ўпрыгажэнні для актавай залы.

Вось так за кубачкам гарбаты і рукадзеллем школьнікі даведаліся пра дзяцінства сваіх мам і татаў, іх мары і клопаты. А бацькі пазнаёміліся з сябрамі сваіх сыноў і дачок, убачылі іх з іншага боку. І ўсе разам напоўніліся новымі эмоцыямі, якімі сённяшнія хлопчыкі і дзяўчынкі будуць дзяліцца праз шмат гадоў ужо са сваімі дзецьмі.

Ганна КАРАЛЕВІЧ.