Прапанаваны ўрок распрацаваны і праведзены ў рамках інавацыйнага праекта “Укараненне мадэлі семантызацыі духоўна-маральных паняццяў і катэгорый на аснове традыцыйных каштоўнасцей беларускага народа”.
Надзея ДРАНІЦА,
настаўнік фізікі і матэматыкі
ДУА “Любчанская сярэдняя школа імя Л.П.Сечкі”
Навагрудскага раёна,
Гродзенская вобласць
Тэма: “Аперацыі над мноствамі”.
Мэта ўрока:
– стварыць умовы для паўтарэння асноўных паняццяў “мноства”, “падмноства”, “аперацыі над мноствамі”;
– развіваць лагічнае мысленне праз рашэнне нестандартных задач, навыкі сістэматызацыі і абагульнення;
– выхоўваць духоўна-маральныя якасці праз семантызацыю паняцця чалавечнасць, цікавасць да прадмета, пашыраць кругагляд.
Ход урока
I Арганізацыйны момант
II Актуалізацыя ведаў
– Што называць «мноствам»?
– Як называюць аб’екты, з якіх складаецца мноства?
– Запішыце, з якіх элементаў, на вашу думку, складаецца мноства “ЧАЛАВЕЧНАСЦЬ”. (Вучні ў групах на асобных лістах запісваюць тры элементы мноства “ЧАЛАВЕЧНАСЦЬ” і вынік працы замацоўваюць на дошцы).
– Што называецца аб’яднаннем мностваў А і В?
– Аб’яднайце вашы мноства “ЧАЛАВЕЧНАСЦЬ” у адно мноства. Памятаем, што элементы, якія паўтараюцца, запісваем адзін раз.
Магчымы вынік працы вучняў:
ЧАЛАВЕЧНАСЦЬ = {добразычлівасць, павага, спачуванне, сціпласць, сумленнасць, шчырасць, уменне дараваць, любоў, увага да чалавека, добрае стаўленне да ўсяго жывога}
– Што называецца перасячэннем мностваў А і В?
– Знайдзіце перасячэнне вашых мностваў “ЧАЛАВЕЧНАСЦЬ”.
Вынік працы
– Як адрозніваюцца мноствы па ліку элементаў?
– Ці можам мы адназначна адказаць на пытанне, што мноства “ЧАЛАВЕЧНАСЦЬ” канечнае?
– Якімі спосабамі можна задаць мноства?
– Якім спосабам мы задалі мноства “ЧАЛАВЕЧНАСЦЬ”?
– Што называецца падмноствам мноства А?
III Асноўны этап
1 Работа па варыянтах
Трое вучняў працуюць каля дошкі, астатнія выконваюць заданні ў сшытках.
Варыянт 1
Віні-Пух і Пятачок прыйшлі ў госці да Труса. Трус пачаставаў гасцей варэннем. Віні-Пух і Пятачок разам з’елі 32 лыжкі варэння, а Віні-Пух і Трус – 23 лыжкі варэння. Колькі лыжак варэння з’елі ўсе трое герояў?
Варыянт 2
А = х│х ∈ N; 2 ≤ х ≤7
В = х│х ∈ N; 4 ≤ х ≤9
Задайце мноства пералікам. Знайдзіце А U В; А В; А \ В; В \ А. Адлюструйце рашэнне на лікавай прамой.
Варыянт 3
Запішыце ўсе падмноствы мноства a; b; с; d.
На сцяне віселі 5 лямпачак. Колькі існуе спосабаў асвятлення сцяны?
Фізкультхвілінка (пад песню “Дабрыня” мультфільм “Фунцік”)
2 Самастойная работа
1. Дадзена мноства А= {1, 3, 5, 7, 9, … , 99}. Выберыце правільныя сцверджанні:
а) 35 ∈ А; в) 27 ∈ А;
б) 48 ∈ А; г) 52 ∈ А.
2. Дадзены мноствы: А = {a, b, c, d}, B = {b, d, e}. Знайдзіце:
а) А ∩ В; б) А U В.
3. Дадзена мноства М = {10, 11, 12, 13, 14, …, 22}. Складзіце:
а) падмноства А мноства М з лікаў кратных 2;
б) падмноства В мноства М з лікаў не кратных 5;
в) падмноства С мноства М з простых лікаў.
4. Прывядзіце прыклады такіх двух мностваў, каб іх аб’яднаннем было мноства К= {5, 6, 8, 10, 17}, а перасячэннем – мноства Р= {8, 10}. Колькі рашэнняў мае задача?
Праз 10 мінут вучні абменьваюцца сшыткамі, ідзе самаправерка.
IV Абагульненне
– Ці праявілі вы чалавечнасць падчас самастойнай працы, праверкі задання і, наогул, на ўроку?
– А якія існавалі магчымасці для праяўлення гэтай якасці чалавека?
– Намалюйце, з якой геаметрычнай фігурай у вас асацыіруецца слова “чалавечнасць” (метад сінэстэзіі).
– Размалюйце фігуру тым колерам, які больш падыходзіць да гэтага паняцця (метад сінэстэзіі).
– Абазначце “чалавечнасць” лічбай (метад сінэстэзіі).
V Падвядзенне вынікаў урока
VI Рэфлексія
– Калі ласка, падзяліцеся сваімі думкамі аб сённяшнім занятку. Працягніце сказы.
– Я даведаўся…
– Я адчуў…
– Я ўбачыў…
– Я заўважыў, што …
– Мне цікава сачыць за…
– Я зараз слухаю і думаю…
VII Дамашняе заданне
№ 81, № 84
Предложить публикацию