Занятак накіраваны на фарміраванне ўстойлівай цікавасці і станоўчых адносін дзяцей малодшага дашкольнага ўзросту да беларускай мовы, а таксама на выхаванне асновы нацыянальнага светапогляду праз гульнявую дзейнасць.
Маргарыта АДАМЧУК,
выхавальнік дашкольнай адукацыі
ДУА “Дзіцячы сад № 40 г. Ліды”,
Гродзенская вобласць
Праграмныя задачы:
– фарміраваць уменне дзяцей адказваць на пытанні выхавальніка асобнымі словамі, працягваць фарміраваць уменне правільна вымаўляць гукі, уласныя імёны, назвы свойскай жывёлы: кот, карова, пеўнік, курачка; актывізаваць слоўнікавы запас дзяцей назвамі свойскай жывёлы, ветлівымі словамі (дзякуй, частуйцеся, калі ласка);
– развіваць мелкую маторыку рук; заахвочваць да эмацыянальнага і выразнага прагаворвання тэксту гульні;
– выхоўваць цікавасць да роднай мовы, аснову нацыянальнага светапогляду, жаданне праяўляць клопат пра жывёл.
Матэрыял і абсталяванне: аўдыязапіс “галасы жывёл”, макеты печы і хаткі, цацкі: курачка, пеўнік, кот, карова; малако ў збаночку, яечка, пячэнне; па колькасці дзяцей: дыдактычная гульня “Пакармі курачку” (скрыначка з ілюстрацыяй курачкі, фасоль), дыдактычная гульня “Кветачкі для каровы” (каляровая ілюстрацыя каровы на лузе, з каляровымі контурамі кветак, рознымі па памеры і колеры, кветачкі розныя па памеры і колеры на ліпучцы), медальёны для рухомых гульняў “Мышы”, “Кароўкі”; салёнае цеста, талерачкі.
Ход занятку
Выхавальнік (у вобразе бабулі): Добрай раніцы! Сёння наша хата гасцямі багата. Шчыра ўсіх вітаем і здароўя жадаем!
Выхавальнік і дзеці: Добрай раніцы мы кажам вам. Вельмі рады мы гасцям!
Выхавальнік: Мяне завуць бабуля Алена. А вас як? (Кожнае дзіця называе сваё імя на беларускай мове.)
Выхавальнік: Я вельмі рада вас бачыць у сваёй хаце. Праходзьце, калі ласка.
(Чуюцца галасы жывёл.)
Выхавальнік: Ай-я-яй! Хто гэта крычыць?
Дзеці па аднаму: Кот, пеўнік, карова і інш.
Выхавальнік: А адным словам – свойская жывёла. Паўтарыце? (Дзеці паўтараюць)
Выхавальнік: Я ж пакарміць жывёлу, забылася. Дзеці, дапамажыце, калі ласка.
(Падыходзяць да пеўніка з курачкай.)
Выхавальнік: Хто гэта?
Дзеці: Курачка, пеўнік.
Выхавальнік: Так, правільна. Гэта ён сёння першы прачнуўся і заспяваў. Як спявае пеўнік?
Дзеці: Ку-ка-рэ-ку! (Дзеці прагаворваюць індывідуальна)
Выхавальнік: Ко-ко-ко! Чуеце, дзеці, курачка сакоча, яна есці хоча. Давайце мы яе пакормім. Вось тут ёсць зярняткі. (Падыходзяць да сталоў, сядаюць)
Выхавальнік: Што любіць курачка?
Дзеці: Зярняткі.
Выхавальнік: Давайце пакормім курачку.
Гульня “Пакармі курачку”
Дзеці сядаюць за сталы, дзе для кожнага ляжыць скрыначка з ілюстрацыяй курачкі, фасоль. Патрэбна, каб дзеці пападалі фасоллю ў дзірачку, быццам “кормяць курачку”.
Выхавальнік: А паглядзіце, што гэта я ў гняздзечку знайшла?
Дзеці: Яечка.
Выхавальнік: Давайце скажам курачцы “дзякуй”.
Дзеці: Дзякуй!
(Гучыць голас каровы)
Выхавальнік: Му-у-у! А хто гэта мяне кліча? Чый гэта голас?
Дзеці: Каровы.
Выхавальнік: Як карова кліча нас? (паўтараюць “Му-у-у”). А давайце пагуляем у гульню “Пастух і каровы”, я буду пастух, а вы кароўкі. (Дзецям раздаюцца медальёны з выявай кароўкі).
Рухомая гульня “Пастух і каровы”
Выйшлі ўсе каровы на лужок,
Каб паскубці муражок.
Тут пастух: “Ту-ру-ру-ру”
А каровы ўслед яму:
– Му-му-му, малака каму?
Усе каровы маюць рожкі,
Хочуць пабадацца трошкі.
Тут пастух: “Ту-ру-ру-ру”,
А каровы ўслед яму:
– Му-му-му, малака каму?
(Дзеці ходзяць за выхавальнікам, імітуючы, як каровы пасуцца, бадаюцца.)
Гульня паўтараецца 2 разы
Выхавальнік: Зараз мы і кароўку пакормім смачнымі кветачкамі. (Дзеці сядаюць за сталы).
Дыдактычная гульня “Пакармі карову кветкамі”
На кожнага выхаванца ляжаць ілюстрацыі “Карова на лузе” і талерачкі з кветкамі, рознымі па памеры і колеры. Выхавальнік прапануе дзецям пакласці кветкі ў адпаведнасці з памерам і колерам кветак на лузе.
Выхавальнік: Вось малайцы якія! Дзеці, а што мы папросім у кароўкі?
Дзеці: Малачка!
Выхавальнік:
Мычыць карова на лузе:
– Му-у, му-у!
Я малака вам даць магу!
Выхавальнік: Вось у нас і малачко, і яечка, і мука ёсць. Будзем пячы аладкі!
(Сядаюць за сталы, дзе ляжыць цеста і талерачкі. Давайце разамнём цеста!)
Пальчыкавая гульня:
Ладачкі, ладкі,
Пякла бабка аладкі (мнуць у далонях цеста)
Маслам палівала
Дзеткам раздавала (пачынаюць адрываць кусочкі цеста і класці на талерачку)
Ані – дзве,
Вані – дзве,
Машы – дзве,
Сашы – дзве.
Добрыя аладкі
У нашай бабкі! (Лепяць аладкі і выкладваюць на талерачку)
Выхавальнік: Вось цяпер мы іх у печку аднясём, хай пякуцца! (Нясуць усе разам)
Раптам чуецца голас ката “Мяў-мяў”, сядзіць каля печы.
Выхавальнік: Гэта ж мой коцік прыбег. Дзе ж ты гуляў? Давайце пагуляем у гульню з коцікам!
Рухомая гульня “Шэры кот” (дзецям адзяваюцца медальёны “мышкі”)
Раз, два, тры, чатыры,
Ката грамаце вучылі:
Не чытаць, не пісаць,
А за мышкамі скакаць. (Ходзяць па крузе)
“Кот”: Мышы ката баяцца?
“Мышы”: Не баяцца!
“Кот”: А я Кот-Катафей
Разганю ўсіх мышэй!
“Кот” ловіць “мышак” – дзеці ўцякаюць. Гуляюць 2 разы.
Выхавальнік (дастае з печы сапраўднае пячэнне ў форме аладак): А вось і аладкі нашы спякліся! Частуйцеся, калі ласка! І пачастуем нашых гасцей.
Дзеці хорам: Частуйцеся, калі ласка!
Предложить публикацию