План-канспект майстар-класа
Павел ЛІЧЭЎСКІ,
настаўнік беларускай мовы і літаратуры
ДУА “Гімназія № 1 імя Ф.Я.Перца г.Пінска”
e-mail:pavellichevsky@gmail.com
Мэты: пазнаёміць удзельнікаў майстар-класа з магчымасцямі выкарыстання квест-гульні на вучэбных занятках і ў пазакласнай дзейнасці; навучыць ствараць квест-гульню, выкарыстоўваючы QR-коды.
Абсталяванне: тэлевізар, раздатачны матэрыял, камп’ютар, прэзентацыя, відэафайлы, картачкі для галасавання.
Ход майстар-класа
І Уступнае слова
Паважаныя калегі! Я рады вітаць вас у нашай гімназіі. Спадзяюся, што сённяшнія заняткі будуць карыснымі для вас, дапамогуць вам разнастаіць працу, абудзяць цікавасць да выкарыстання інтэрнет-тэхналогій на вучэбных занятках і ў пазакласнай дзейнасці.
ІІ Што такое квест
Часткова разабрацца ў тым, што такое квест, дапаможа вядомая дзіцячая гульня “Дванаццаць запісак”. Яе любяць праводзіць у летніх лагерах. Каманда атрымоўвае першую запіску, у якой змяшчаецца зашыфраваная інфармацыя пра тое, дзе патрэбна шукаць наступную запіску. Гульня завяршаецца, калі каманда паслядоўна прайшла ад пункта да пункта і дабралася да апошняй запіскі, а з ёю – і да заслужанага прыза.
Слова quest перакладаецца на беларускую мову як “пошук”.
Квест прадугледжвае выкананне якога-небудзь задання. Задача ўдзельнікаў гульні заключаецца ў тым, каб паварушыць мазгамі для вырашэння прапанаванай задачы, а таксама праявіць кемлівасць і ўменні, каб справіцца з заданнем.
Мы прапануем нашым вучням медыяквест. Заданні, якія ім трэба знайсці і разгадаць, ствараюцца ў выглядзе QR-кодаў. QR-коды прачытваюцца з дапамогай смартфона, на які ўсталявана праграма QR Code Reader.
(прапаную ўдзельнікам майстар-класа, у якіх ёсць смартфоны ўстанавіць праграму Qr Code Reader)
ІІІ Прыклад квест-гульні
Прапаную пазнаёміцца з заданнямі квест-гульні “Мая гімназія” і віктарыны “Падарожжа ў свет літаратуры”.
(лісты з Qr-кодамі раздаюцца ўдзельнікам, і яны з дапамогай праграмы Qr Code Reader знаёмяцца з заданнямі).
IV QR-коды
QR-коды – адносна новая тэхналогія перадачы інфармацыі. Гэта блізкія родзічы знаёмых нам штрых-кодаў, якія сёння абавязкова маюцца на ўпакоўках большасці тавараў.
Пра QR-коды маецца многа інфармацыі ў інтэрнеце. Але чым гэта можа быць карысна настаўнікам і вучням? Гэты невялікі узор можа зэканоміць час і паперу, пазбавіць ад перадрукавання доўгіх спасылак або хаця б разнастаіць руціну.
Што кадзіраваць
Гэта можа быць відэа з YouTube, лакацыя на Google-картах, файл з Google Дыска, профіль у сацыяльных сетках, тэлефонны нумар або e-mail. Словам, усё, што можна адправіць па пошце або цераз сацыяльныя сеткі. Раздрукаваныя QR-коды можна прымацаваць да любой паверхні, ці гэта сцяна або ліст паперы.
QR-віктарына
QR Treasure Hunt Generator аўтаматычна стварае віктарыну з прапанаваных пытанняў. Затым раздрукаваныя коды можна размеркаваць па класу або па школьным двары, і тады вучні падцягнуць не толькі веды, а і фізічную падрыхтоўку.
Як кадзіраваць
Для стварэння ўласнага QR-кода спатрэбяцца інтэрнет, прынтэр і камера. Прасцей за ўсё стварыць QR-код на сайце qrcoder.ru
Калі патрэбна нешта большае, то сэрвіс QrStuff за некалькі клікаў дапаможа стварыць коды розных колераў. Праграма Kaiwa ператварае ў QR-коды не толькі гіперссылкі, але і самы звычайны тэкст, набраны ў тым ліку і кірыліцай. У такім выпадку не патрэбен нават інтэрнет, каб прачытаць закадзіраванае пасланне, што адкрывае цэлае поле для эксперыментаў.
Як чытаць QR-коды
Самая простая праграма – Qr Code Reader, амаль універсальная – Reader Kaiwa, больш сур’ёзная – QR Droid, для iOS падыходзіць праграма Neoreader.
V Практычная частка
1 Удзельнікі майстар-класа прыдумваюць некалькі заданняў для квест-гульні.
2 З дапамогай праграмы QRCODER.RU Заданні пераводзяцца ў QR-коды і раздрукоўваюцца.
VІ Рэфлексія
Свае уражанні пра майстар-клас удзельнікі выказваюць пры дапамозе створанага імі QR-code.
Предложить публикацию