У сярэдняй школе № 3 Навагрудка праходзіць акцыя “Упрыгожым школу да Новага года”. Да штогадовай святочнай падрыхтоўкі школы ўсе падыходзяць з асаблівай адказнасцю. Цацкі, сняжынкі, казачныя персанажы ўпрыгожваюць кабінеты, калідоры, вокны і прыгажуню-ёлку.
Цудоўная кампазіцыя, зробленая з папяровых сняжынак, ахоплівае вокны другога і трэцяга паверхаў. Тут і сімвал надыходзячага году, і снегавікі, і рознакаляровыя шары. Такое ўпрыгожанне выглядае эфектна і задае святочны настрой.
Нашы бацькі з дзецьмі з вялікім задавальненнем і натхненнем майструюць разнастайныя вырабы на навагоднюю тэматыку сваімі рукамі. Асабліва хочацца адзначыць бацькоў і вучняў 4 “Б” класа.
Сям’я Валерыі Хандрыка зрабіла незвычайную рознакаляровую ёлку. Вікторыя Гуцько з мамай падрыхтавалі кампазіцыю “Чарадзейныя сняжынкі”. Такімі вырабамі мы ўпрыгожваем спецыяльныя фотазоны на кожным паверсе, дзе дзеці і дарослыя папаўняюць сваю галерэю фотаздымкаў.
Навагоднія клопаты – гэта асаблівы цуд, які запаўняе школу радасцю і пазітывам. А чакаць засталося зусім мала: хутка Дзед Мароз са Снягуркай прынясуць дзецям падарункі,радасць і вясёлыя конкурсы.
Дар’я КАРАВАЙ,
настаўнік беларускай мовы і літаратуры
сярэдняй школы № 3 Навагрудка
Предложить публикацию