У Рэплеўскім дзіцячым садзе – сярэдняй школе Ваўкавыскага раёна прайшло мерапрыемства ў рамках інфармацыйна-адукацыйнага праекта “Школа Актыўнага Грамадзяніна” па тэме “Глядзі і памятай” (да 80-годдзя з дня пачатку Вялікай Айчыннай вайны).
На сустрэчу з навучэнцамі 8–10-х класаў прыйшоў член Саюза пісьменнікаў Беларусі, аўтар зборнікаў паэзіі “Пах медуніцы” і “На скрыжаванні восені і лета” паэт Віктар Курловіч. Ён чытаў дзецям вершы пра вайну, расказваў пра свае дзіцячыя гады, пра сустрэчы і размовы з сапраўднымі сведкамі вайны. У сваім вершы “Забойцам няма апраўдання” Віктар Георгіевіч расказаў, як адыходзілі на фронт бацькі, браты, сыны; як у смяротнай сутычцы з ворагам загартоўваліся і мацнелі ў савецкіх воінаў любоў да роднай зямлі, рашучасць абараняць Радзіму да апошняй кроплі крыві. Асабліва кранулі вучняў вершы пра маладога змагара, які быў сынам, братам, у якога вайна адабрала магчымасць мірна жыць, вучыцца, працаваць і знаходзіцца побач са сваімі блізкімі.
У канцы сустрэчы Віктар Курловіч наказаў навучэнцам свята захоўваць спадчыну беларускага народа, памятаць тых, хто заплаціў сваім жыццём за мірнае неба над галавой і адказаў на пытанні дзяцей.
Ілона МАЛЧАНАВА,
намеснік дырэктара па вучэбнай рабоце
Рэплеўскага дзіцячага сада – сярэдняй школы
Ваўкавыскага раёна
Предложить публикацию