У артыкуле аўтар прапануе чытачам выкарыстоўваць на занятках з дашкольнікамі практыкаванне “Зносіны з ракавінкамі”. Яно накіравана на згуртаванне калектыву, здыманне камунікатыўных бар’ераў, развіццё сэнсарнай актыўнасці дзяцей.
Вольга ТУРУТА,
педагог-псіхолаг
ДУА “Санаторны яслі-сад № 9 г. Смаргоні”,
Гродзенская вобласць
У санаторным яслях-садзе № 9 Смаргоні выхаванцы старшай групы № 5 сабраліся ў кабінеце педагога-псіхолога на чарговым эколага-псіхалагічным трэнінгу. Шмат цікавых заданняў выконвалі дзеці, але найбольшую зацікаўленасць выклікала практыкаванне “Зносіны з ракавінкамі”.
Мэта: практыкаванне сацыяльна-псіхалагічнага трэнінгу накіравана на згуртаванне калектыву, здыманне камунікатыўных бар’ераў, самараскрыццё дзяцей, развіццё экацэнтрычнай свядомасці і сэнсарнай актыўнасці ў дзяцей і педагогаў.
Матэрыял: рэчы нежывой прыроды – ракавінкі. Матэрыял павінен быць чыстым.
Колькасць чалавек: 8–12.
Працягласць занятку: 30–40 хвілін.
Ход занятку
Псіхолаг вітае дзяцей. Яны сядаюць у круг. Выбіраюць сабе ракавінку з агульнай скрынкі. Гэта можна зрабіць з закрытымі вачыма. Дзеці вывучаюць свае ракавінкі.
Педагог-псіхолаг пытаецца, а кожны з дзяцей адказвае на пытанне:
- Паглядзіце на колер ракавінкі, які ён?
- Якой яна формы?
- Памацайце, яна шурпатая альбо гладзенькая?
- Прыкладзіце да шчакі, ілба. Цёплая альбо халодная?
- Узважце на далоні. Лёгкая альбо цяжкая? Параўнайце з ракавінкай суседа.
- Панюхайце. Чым яна пахне?
- Уявіце, што вы пакаштавалі ракавінку. Што вы адчулі б, калі яе пакаштавалі?
- Прамоўце слова “ракавінка” ціха, моцна, працягла, хутка, пытаючыся, сцвярджаючы, сумна, весела. Няхай гэта слова скажуць дзяўчынкі, хлопчыкі адзін аднаму на вуха.
- Паграбіце ногцем па ракавінцы, што вы пачулі?
- Знайдзіце ў ракавінцы вушка (дзірачку, трэшчынку). Раскажыце ёй, як вас завуць, як завуць вашу маму, тату, сябра, ваш самы вялікі сакрэт. Закрыйце пальчыкам вуха ракавінцы, яна зберажэ ваш сакрэт у таямніцы.
- Уявіце, што вы зрабіліся маленькімі і цяпер жывяце ў ракавінцы. Дзе вы зробіце сабе хатку, сад, агарод (пакажыце пальчыкам)?
- Кіньце ракавінкі ў посуд з вадой, што з імі адбылося? Якія яны зрабіліся?
- Што можна зрабіць з ракавінкі? Упрыгожванне (павесіць на шнурочак), узор, цацку-абарабанку (некалькі ракавінак палажыць у банку). Зрабіце гэта.
- Абвядзіце ракавінкі на паперы, размалюйце іх.
У канцы трэнінгу дзеці дзеляцца сваімі пачуццямі, уражаннямі. На практыкаванні неабавязкова выкарыстоўваць усе пералічаныя заданні. Можна прыдумаць новыя, змяніць, развіць. Галоўнае – творчы падыход.
Предложить публикацию