Міністр адукацыі Андрэй Іванец сустрэўся з навучэнцамі школ Жодзіна і прадстаўнікамі савета маладых вучоных пры Міністэрстве адукацыі.
Сустрэча прайшла ў фармаце адкрытага дыялогу і была праведзена на БелАЗе — найбуйнейшым сусветным вытворцы самазвалаў і транспартнага абсталявання для горназдабываючай і будаўнічай прамысловасці. БелАЗ не выпадкова быў выбраны пляцоўкай: вельмі важна, каб і навучэнцы школ, і студэнты, і навуковая моладзь разумелі, што ў нашай краіне сацыяльна-эканамічная палітыка развіваецца дынамічна.
Аляксей Ермакоў, кіраўнік савета маладых вучоных пры Міністэрстве адукацыі, загадчык кафедры гандлёвага і рэкламнага абсталявання БНТУ, расказаў, што на сустрэчу прыехалі маладыя вучоныя, якія прадстаўляюць многія ўніверсітэты краіны, — ім ёсць што абмеркаваць як са школьнікамі, так і з маладымі спецыялістамі БелАЗа. У сферы навукі і інавацый штодзень адбываюцца новыя адкрыцці, таму вельмі важна ўкараняць навінкі на прадпрыемствах.
“Знаходзячыся тут, на Беларускім аўтамабільным заводзе, мы хацелі азнаёміць нашых маладых людзей з тымі прадпрыемствамі, якія выклікаюць гордасць за ўсю краіну, — адзначыў міністр адукацыі. — Нашы выпускнікі павінны ведаць, што ў нас ёсць будучыня, перспектывы, ёсць высокатэхналагічная вытворчасць, на якой чакаюць моладзь”.
Падчас экскурсіі па заводзе міністр і прадстаўнікі савета маладых вучоных наведалі музей працоўнай славы, а таксама цэх па вытворчасці звышцяжкіх машын.
Да ўдзелу ў дыялогу з міністрам былі запрошаны і моладзь, якая займаецца навукай, і школьнікі, — яны павінны ўбачыць, якія перспектывы іх чакаюць ва ўстановах вышэйшай адукацыі краіны. А студэнты ў сваю чаргу павінны ведаць, дзе іх чакаюць у якасці спецыялістаў.
На пачатку сустрэчы А.Іванец падзякаваў кіраўніцтву прадпрыемства за тое, што дазволілі сустрэцца на тэрыторыі завода, і справядліва заўважыў, што БелАЗ — візітная картка не толькі Жодзіна. “Гэта — флагман нашай краіны, мы ім ганарымся, — сказаў А.Іванец. — Упэўнены, што сёння якраз той выпадак, калі лепш адзін раз убачыць, чым 100 разоў пачуць: маштабы гэтага прамысловага гіганта ўражваюць. Хачу, каб мы з вамі шчыра пагаварылі і абмеркавалі тыя пытанні, якія вас хвалююць. Наш дыялог можа быць нестандартным, але тым ён і адметны”.
Закранаючы тэму навукі і адукацыі, Андрэй Іванавіч заўважыў, што профільнае міністэрства ўдзяляе шмат увагі развіццю моладзі на ўсіх узроўнях, а таксама адзначыў, што асаблівае значэнне адводзіцца прафарыентацыі. Усё ж гэта правільны падыход: важна, каб навучэнцы ўсвядомлена выбіралі будучую прафесію, каб пасля не шкадавалі аб зробленым выбары. Міністр адукацыі ўпэўнены, што прафесія, якую выбірае малады чалавек, павінна дапамагчы рэалізавацца ў жыцці:
“Сёння на БелАЗе мы ўбачылі, што сваё месца ў жыцці знайшлі многія маладыя людзі, якія скончылі не толькі ўстановы прафесійна-тэхнічнай адукацыі. Тут, на прадпрыемстве, могуць у поўнай меры рэалізавацца і выпускнікі ўстаноў вышэйшай адукацыі. Але самае галоўнае, што ляжыць у аснове поспеху кожнага маладога спецыяліста, — і з гэтым згадзіліся супрацоўнікі прадпрыемства — гэта праца. Ніякіх іншых сакрэтаў для моладзі сёння не існуе. Кожны павінен разумець, што выключна ведамі, уменнямі і працай можна ўнесці свой уклад у развіццё краіны. Захоўваючы прамысловасць, інтэлектуальны патэнцыял і адукацыю, мы можам гаварыць пра захаванне нашай гісторыі.
У кожнага ёсць школа, куды мы калісьці прыйшлі ў 1 клас, ёсць першы настаўнік, які навучыў першым словам, даў першыя веды.
І, безумоўна, ёсць наша краіна і яе гісторыя, якой мы павінны ганарыцца. Таму так важна берагчы памяць і мінулае, помніць гісторыю і свае карані.
Безумоўна, важным з’яўляецца захаванне не толькі ўсіх сектараў нашай эканомікі, але і стабільнасці, незалежнасці краіны. За гэтым словам у першую чаргу стаіць незалежнасць ва ўсіх сферах: у эканоміцы, прамысловасці, грамадстве. У нас ёсць не проста патэнцыял, сёння мы маем сур’ёзныя вынікі ва ўсіх гэтых кірунках. Разам са сваімі партнёрамі мы можам супрацьстаяць любым эканамічным складанасцям. Толькі дзякуючы нам, наша краіна будзе развівацца. Важна, каб таленавітая і адораная моладзь заставалася ў краіне і развівала яе. Мы нікога не хочам згубіць — толькі падтрымаць і падказаць, у якім кірунку рухацца”.
Звяртаючыся да школьнікаў, Андрэй Іванец нагадаў, што без настаўнікаў ні адзін вучань не можа дасягнуць поспеху.
“Быць настаўнікам — гэта цяжкая праца, — акцэнтаваў увагу міністр адукацыі. — У настаўнікаў, бацькоў і навучэнцаў заўсёды ёсць узаемныя інтарэсы. Я ўпэўнены, што да таго часу, пакуль сярод нас будуць сапраўдныя педагогі, настаўнікі, якія выхоўваюць нас як патрыётаў, у нашай краіны ёсць будучыня”.
А.Іванец многа ўвагі ўдзяліў пытанням захавання гістарычнай памяці:
“У кожнага з нас ёсць малая радзіма. Мы яе памятаем, беражом і паважаем. А яшчэ ў кожнага ёсць школа, куды мы калісьці прыйшлі ў 1 клас, ёсць першы настаўнік, які навучыў першым словам, даў першыя веды. І, безумоўна, ёсць наша краіна і яе гісторыя, якой мы павінны ганарыцца. Таму так важна берагчы памяць і мінулае, помніць гісторыю і свае карані. Гісторыя нашай краіны вельмі цікавая, яна — прадмет нашай гордасці, як і незалежнасць. А незалежнасць, дарэчы, дорага каштуе. Таму перад намі сёння стаіць
важная задача: цаніць і берагчы тое, што нам далі бацькі і настаўнікі. Адукаваныя людзі гэта разумеюць, і відавочна, што, калі ў нас будзе добрая адукацыя, значыць, у нас будзе ўсё. Трэба слухаць сваё сэрца і выбіраць тое, што вам блізка”.
Дарэчы, падчас дыялогу з міністрам школьнікі і прадстаўнікі савета маладых вучоных цікавіліся пытаннямі размеркавання, сістэмай прадастаўлення льготных крэдытаў для выпускнікоў УВА, пытаннямі арганізацыі выпускных і ўступных экзаменаў і інш.
Наталля САХНО.
Фота аўтара.
Предложить публикацию