Вольга ТУРУТА,
педагог-псіхолаг
ДУА “Сярэдняя школа № 5 г.Смаргоні”,
Гродзенская вобласць
Мэта: фарміраванне ў дзяцей нацэленасці на агульны вынік у сумеснай працы.
Задачы:
– фарміраванне даверных узаемаадносін у калектыве;
– развіццё навыкаў групавога ўзаемадзеяння;
– усведамленне кожным удзельнікам сваёй ролі, функцыі ў групе.
Матэрыял: лісты паперы фармату А4, выразаныя з каляровай паперы прамавугольнікі, алоўкі (фарбы), ватман.
Час: 30–40 хвілін.
Узрост: 9–12 год.
Колькасць удзельнікаў: 3–12.
Форма правядзення: групавая.
Ход занятку
Псіхолаг: Добры дзень. Зараз мы як заўсёды будзем вітаць адно аднаго ўсмешкай (па крузе запускаецца імпульс у выглядзе добрай усмешкі).
Давайце ўявім, што мы трапілі на бязлюдны востраў. Каб хутчэй вярнуцца дадому, нам патрэбна выканаць некалькі заданняў.
Дзеці сядаюць у круг і знаёмяцца з правіламі гульні.
1. Час на падрыхтоўку задання неабмежаваны, дазваляецца ў гэты перыяд размаўляць.
2. Выконваць заданні пачынаем пасля таго, як уся група скажа: “Мы падрыхтаваны!”
3. Калі хтосьці з удзельнікаў не можа выканаць заданне альбо не хоча, група яму дапамагае.
Заданне 1
Псіхолаг: На востраве нас ніхто не бачыць і не чуе. Давайце разам будзем падаваць сігналы, каб нас заўважылі. Усе ўдзельнікі адказваюць на мае гукі дружным рэхам.
Напрыклад, на пляск у далоні псіхолага дзеці павінны адказаць таксама дружным пляскам (стук па стале; прытопванне адной нагой, дзвюма; пляск у далоні над галавой і г.д.).
Заданне 2
На падлогу псіхолаг раскладае лісты паперы. Дзеці становяцца ў пары. Кожная пара павінна стаць на ліст разам так, каб кожнаму хапіла месца.
Заданне 3
Псіхолаг: Давайце ўявім, што на востраве ў нас ёсць магчымасць пабудаваць хату. Якая яна? Для гэтага кожны ўдзельнік падыдзе да стала і намалюе на ватмане лінію альбо элемент хаты і яе наваколле. Тое, што намалявалі, сціраць нельга, можна толькі дамалёўваць. Кожны мае права маляваць тое, што лічыць патрэбным.
Пасля ўдзельнікі разглядаюць малюнак і адказваюць на пытанні: “Ці ўсім падабаецца хатка? Ці ўтульная яна для кожнага з вас?”
Заданне 4
Псіхолаг раздае каляровыя карткі, у якіх на адваротным баку прапануе адлюстраваць мімічны эталон кожнага ўдзельніка на бязлюдным востраве (радасці, суму, гневу, здзіўлення, страху). Пасля задання псіхолаг падлічвае ва ўдзельнікаў, які эталон сустракаецца часцей.
Заданне 5
Псіхолаг прапануе ўсім скласці агульны верш пра востраў. Калі прачыталі верш, падарожжа завяршаецца.
Рэфлексія
Які настрой у вас зараз?
Якую выснову вы можаце зрабіць пасля занятку?
Якое заданне было выконваць лёгка, а якое цяжка?
Рытуал развітання
Дзеці становяцца ў круг, паціскаюць адно аднаму рукі і дзякуюць за ўдзел у сумеснай працы.
Предложить публикацию