Марожанае для Ката Матроскіна. Канспект занятку для выхаванцаў сярэдняй групы па адукацыйнай галіне “Выяўленчае мастацтва” (маляванне)

Сцэнарый занятку для выхаванцаў сярэдняй групы па адукацыйнай галіне “Выяўленчае мастацтва”

Марына ГОМАН,
выхавальнік дашкольнай адукацыі
ДУА “Смаргонскі дашкольны цэнтр развіцця дзіцяці”
Гродзенская вобласць

Тэма: Марожанае для Ката Матроскіна.

Мэта: развіццё творчых здольнасцей дзяцей праз нетрадыцыйныя тэхнікі выяўленчага мастацтва.

Задачы:

– фарміраваць уменне выкарыстоўваць колеры (ружовы, жоўты, фіялетавы) як сродак выразнасці;
– фарміраваць уменне выяўляць у малюнку сваё стаўленне да вобразаў;
– развіваць цікавасць да выяўленчай і творчай дзейнасці, мастацкага эксперыментавання;
– развіваць выяўленчыя здольнасці, творчае ўяўленне;
– выхоўваць жаданне прымяняць даступныя выразныя сродкі для адлюстравання свайго стаўлення да створаных у малюнках выяў, эстэтычныя пачуцці.

Папярэдняя работа: экскурсія на філіял “Смаргонскія малочныя прадукты” ААТ “Лідскі малочна-кансервавы камбінат”, маляванне ражка на лісце паперы, размова з дзецьмі на тэму “Малочныя прадукты”, разглядванне малюнкаў у альбоме “Прадукты харчавання”, размова пра розныя віды марожанага, загадванне загадак, чытанне вершаў пра прадукты харчавання.

Матэрыялы і абсталяванне: малюнкі з выявай розных відаў марожанага, пена для галення, клей ПВА, альбомны ліст паперы, гуаш, сурвэткі, лыжачкі, талерачкі, пасыпка для ўпрыгожвання, цацка Ката Матроскіна.

Ход занятку

Арганізацыйны момант. Прывітанне

Выхавальнік:

Вочкі, вы прачнуліся?
Прачнуліся!
Шчочкі, вы прачнуліся?
Прачнуліся!
Вушкі, вы прачнуліся?
Прачнуліся!
Ручкі, вы прачнуліся?
Прачнуліся!
Ножкі, вы прачнуліся?
Прачнуліся!
Дзеткі, вы прачнуліся?

Дзеці: Прачнуліся!

Асноўная частка 

У госці да дзяцей прыходзіць Кот Матроскін

Выхавальнік: Дзеткі, а цяпер адгадайце загадку:

Любіць есці бутэрброд,
Не як усе, наадварот.
Усім знаёмы гэты кот.
Варыць смачны ён кампот.
Гаспадарку сам вядзе.
У Прастаквашына жыве
Ён у цяльняшцы, як марак.
Зваць ката скажыце як? (Кот Матроскін)

Выхавальнік садзіць каля сябе Ката Матроскіна (цацка).

Выхавальнік: Правільна! Гэта Кот Матроскін. Але паглядзіце, дзеткі, які ён сумны. Раніцай, калі я ішла на працу, сустрэла ката Матроскіна і ён мне паскардзіўся, што карова Мурка дала так шмат малака, што наш Матроскін і смятану зрабіў, і тваражок. А з астатнім малаком не ведае, што рабіць! Мы дапаможам нашаму Кату Матроскіну прыдумаць, што можна зрабіць с астатнім малаком?

Дзеці: Так!

Выхавальнік: Добра, тады давайце падумаем, што мы можам з вамі зрабіць з малака такое смачнае, салодкае, халоднае?

Дзеці: Марожанае!

Выхавальнік: Так, малайчынкі!

Размова “Якое бывае марожанае”

Выхавальнік: Дзеткі, мы з вамі ведаем, што марожанае робяць з малака. А якога колеру яно тады атрымаецца.

Дзеці: Белага.

Выхавальнік: А вы ведаеце, як можна змяніць колер?

Дзеці: Дадаць нешта каляровае.

Выхавальнік: Так, напрыклад, можна дадаць розныя ягады ці фрукты. А яшчэ, у прамысловасці выкарыстоўваюць спецыяльныя харчовыя фарбы. Калі мы дададзім маліну ці ружовую фарбу, якое марожанае атрымаецца?

Дзеці: Ружовае!

Выхавальнік: А калі дадаць жоўтую, якога колеру яно стане?

Дзеці: Жоўтага!

Выхавальнік: А калі дабавім нешта фіялетавае?

Дзеці: Фіялетавага!

Выхавальнік: Малайчынкі! Але нешта наш Матроскін засумаваў, давайце разам з ім зробім размінку!

Фізхвілінка

Раз – падняцца, пацягнуцца,
Два – нагнуцца, разагнуцца,
Тры – у ладкі тры разы,
На чатыры – паўздыхаць,
Пяць – рукамі памахаць,
Шэсць – на месца ціха сесці!

Гімнастыка для вачэй

На палачках ад марожанага наклеены сняжынкі. Выхавальнік з Катом Матроскіным раздае кожнаму дзіцяці палачку і дае пакрокавую інструкцыю.

Выхавальнік: Дзеткі, паглядзіце, наш Матроскін павесялеў трошкі, ён хоча даць вам палачкі ад марожанага. Паглядзіце! Гэта незвычайныя палачкі, яны чароўныя! На іх прыляцелі і селі сняжынкі. Збеглі ад злой халоднай зімы, да нам з вамі, у нашу цёплую і добразычлівую групу. Гэтыя сняжынкі вельмі хочуць пагуляць с вашымі вочкамі. Давайце станем каля нашых крэсельцаў і, не адрываючы вочак ад сняжынкі, пасочым за яе рухамі. Пры гэтым наша галава і шыя не варочаюцца, не забываемся.

Вось сняжынка паляцела ўверх, а цяпер уніз, управа, улева (і так некалькі разоў). А цяпер сняжынка паляцела па крузе. Малайчынкі! Сядаем на месцы. 

Выхавальнік: Дзеткі, давайце мы пакажам і раскажам нашаму Матроскіну, якое марожанае бывае. Паглядзі, Матроскін. Яно бывае якое?

– з адным шарыкам;
– з двума шарыкамі;
– з трыма шарыкамі;
– на палачцы;
– у шкляначцы;
– у брыкеце.

Выхавальнік: Малайцы! А зараз, дзеці, я вам пакажу, як мы з вамі зробім марожанае для Ката Матроскіна.

Вось я бяру лісцік, з намаляваным ражком, прытрымліваю яго адной рукой, другой рукой бяру чыстую лыжачку, зачэрпваю масу. Якога колеру?

Дзеці: Ружовага!

Выхавальнік: Так! І, як сапраўднае марожанае, кладу нашу масу зверху ражка, не выходзячы за краі. Кругавымі рухамі размяркоўваю на лісце паперы масу з аднаго боку. Запэцканую лыжачку я кладу на сурвэтку. Далей бяру зноў чыстую лыжачку, зачэрпваю масу. Якога колеру?

Дзеці: Фіялетавага!

Выхавальнік: Так! Кладу з другога боку, і кругавымі рухамі размяркоўваю на лісце паперы. Запэцканую лыжачку кладу на сурвэтку. Бяру трэцюю чыстую лыжачку, зачэрпваю масу. Якога колеру?

Дзеці: Жоўтага!

Выхавальнік: Так! Кладу зверху двух нашых шарыкаў і таксама кругавымі рухамі размяркоўваю над двума шарыкамі. Запэцканую лыжачку кладу на сурвэтку. Далей бяру пасыпку, каб упрыгожыць. Вось якое прыгожае рознакаляровае марожанае атрымалася!

Праца за сталамі

Выхавальнік: Цяпер сядаем за нашы сталы. Але перад тым, як прыступіць да працы мы зробім гімнастыку для нашых пальчыкаў.

Пальчыкавая гімнастыка 

Вельмі радуюцца дзеці (пляскаем у далоні).
Прынесла мама ў пакеце (ідзём пальчыкамі)
Абаранчыкаў – для Кацечкі, (згінаем пальчыкі)
Пернічкаў – для Надзечкі,
Ярыку – пірожнае,
Ну, а мне – марожанае!

Выхавальнік: Ну, а цяпер пачынаем рабіць марожанае для нашага Матроскіна (Паўторная пакрокавая інструкцыя).

Рэфлексія

Выхавальнік: Дзеткі, цяпер наш Кот Матроскін хоча пачуць ад вас, як жа атрымалася такое прыгожае марожанае? Давайце яму раскажам. (Дзеці с дапамогай мнематабліцы расказваюць Кату пакрокава, як рабілі сваё асабістае марожанае).

Рэфлексія пры дапамозе мнематабліцы

Колер	Форма	Памер
Колькасць	Дробныя элементы малюнка (упрыгожванне)	Адзнака працы
1                 2                 3

Выхавальнік: Кату Матроскіну вельмі спадабалася ў нас у гасцях. Ён вельмі ўдзячны вам за тое, што дапамаглі яму перапрацаваць лішняе малако. Матроскін кажа вам, дзеткі, вялікі дзякуй і да новых сустрэч!

Поделиться ссылкой: