“Сустракаем Новы год!”. Ранішнік для дзяцей старшай группы (5-6 гадоў)

- 12:26Дошкольное образование. Сценарии, Методичка

 

Маргарыта ТАРАСЕВІЧ,
музычны кіраўнік
ДУА “Яслі-сад № 83 г. Гродна”

 

 

 

Мэты: выклікаць цікавасць да свята, стварыць святочны навагодні настрой.

Матэрыял і абсталяванне: навагодняя ёлка, званочкі, снежкі, кошык, снежны ком, мех з падарункамі.

Папярэдняя работа: гутарка пра Новы год, пра традыцыі святкавання, развучванне вершаў, танцаў і песень.

Дзейныя асобы: дарослыя – вядучы, Снягурка, Зайчык, Дзед Мароз, Баба-Яга; дзеці – Воўк, Вавёрка.

 

Ход ранішніка

Зала мае выгляд святочна ўпрыгожанага зімовага лесу. Гучыць навагодняя музыка. Дзеці ўваходзяць у залу.

Вядучы:

Добры дзень усім вам, шаноўныя! Адгадайце маю загадку.

Белым пухам замяло
I палеткі, і сяло.
Мост праз рэчку хутка ляжа.
А што гэта, хто адкажа?
                                       (Зіма)

1-е дзіця:

Закружыліся сняжынкі
Нізка, нізка над зямлёй.
Ціха лётаюць пушынкі
Незлічонай чарадой.

2-е дзіця:

Быццам тыя матылёчкі,
Весяляцца нездарма –
Адамкнула ўсе замочкі
У небе ім сама зіма.

 

Песня: “Зіма”

З’яўляецца Снягурка.

 

Снягурка:

Прывітанне вам, сябры!
Што там робіцца ў двары!
Тут так цёпла, тут так суха,
А знадворку – завіруха!
Завіхаюцца вятры,
Завываюць на двары…
А ў вас, я бачу, свята.
Ці запросіце да вас?

Дзеці:
Так, запросім!

Снягурка:

Будзем разам святкаваць,
Будзем танчыць ды спяваць!

Песня “Зімовы карагод”

Снягурка:
А цяпер, дзеці, мы з вамі пагуляем у гульню са званочкамі.

 

Гульня “Хутчэй падымі званочак”

Дзеці сядаюць. У пакой забягае Зайчык, хаваецца за ялінку.

 

Заяц:

Вой, ратуйце мяне!
Вой, хавайце мяне!
За мной мароз бяжыць,
Памарозіць мяне!

Снягурка:

Не хавайся, зайка, выйдзі!
Не дамо цябе пакрыўдзіць!
Патанцуеш з намі разам,
Дык сагрэешся адразу!

 

Танец “Полечка”

 

Заяц:

Гэтак цёпла стала мне!
Зараз трохі адпачнем!

Дзеці садзяцца.

 

Вядучы:

У цёмным лесе надвячоркам
Шэры воўк сустрэў вавёрку.

Вавёрка:

Прывітанне, шэры нос!

Воўк:

Прывітанне, руды хвост!
Ты куды?

Вавёрка:
Да зайкі ў госці!

Воўк:

Што ж мяне ён не запросіць!
Я галодны – няма сіл!

Вавёрка:

Ты жа моркву не ясі!

Воўк:

Ёсць там страва мне пад густ!

Вавёрка:

Што – гарэхі? Ці капуста?
Ці грыбочкі? Прызнавайся!

Воўк:

Я люблю гасцінных зайцаў!

Заяц:

А я не баюся ў лесе нікога!
Мне, зайцу касому, усюды дарога!
Гатовы я выйсці і супраць ваўкоў:
У лесе зімовым хапае сняжкоў!

 

Гульня “Снежкі” (выцягваецца кошык са сняжкамі, дзеці шпурляюць сняжкі)

 

Заяц:
А ці ведаеце вы, дзеці, што пад Новы год заўсёды адбываюцца незвычайныя прыгоды? Вось і сёння, мне здаецца, штосьці павінна адбыцца. Але мне ўжо пара, да пабачэння, дзеці.

Снягурка:

Ёсць у мяне
І вясёлы падарунак,
І салодкі пачастунак.
Дзед Мароз яго прынёс!

Усе гукаюць:

Дзед–Ма–роз!

 

Пад музыку выходзіць Дзед Мароз.

 

Дзед Мароз:
Нехта клікаў тут мяне. Мне не падалося?

Вядучыя і дзеці:
Не!

Дзед Мароз:

Добры дзень, дзеці,
Добры дзень, госці,
Мы сустракаем сёння свята,
Няхай пануе шчасце ў хаце.
У святочны гэты час,
Віншую шчыра вас
Са святам! З Новым годам!
Ну-ка, з вамі пагуляем, станавіцесь у карагод!

 

“Гульня-карагод з Дзедам Марозам”

Дзеці сядаюць.

 

Вядучы:
Дзядуля Мароз, трэба запаліць агеньчыкі на навагодняй ёлцы.

Дзед Мароз:
Правільна! Толькі як жа яны запальваюцца, ніяк не магу ўспомніць!

Снягурка:
Трэба сказаць чарадзейныя словы.

Святочныя агеньчыкі,
Гарыце ўсё ярчэй!
Свята навагодняе
Сёння ў дзяцей!

 

Агеньчыкі не запальваюцца.

 

Вядучы:
Дзядуля Мароз, што такое? Ні адзін агеньчык не запаліўся!

 

Пад музыку выскаквае Баба-Яга.

 

Баба-Яга:
I не запаляцца! I не запаляцца!

Дзед Мароз:
Ты хто? Гэта яшчэ чаму не запаляцца?

Баба-Яга:
Я Баба-Яга! А таму не запаляцца, што гэтыя чарадзейныя словы ажно залеташнія! А чарадзейныя словы гэтага года я ў Снягуркі толькі што выцягнула і з’ела!

Дзядуля Мароз:
Як гэта, з’ела?!

Баба-Яга:
А вось так! (Паказвае, як яна ела словы, і са смехам хаваецца за ёлкай )

Снягурка:
Што ж нам рабіць, дзядулечка?! Няўжо свята не адбудзецца?!

Дзед Мароз:
Ну што ты, унучачка! Адбудзецца, абавязкова адбудзецца!

Снягурка:
Але ж я не памятаю чарадзейных слоў!

Дзед Мароз:
А мы абыдземся і без іх!

Снягурка (радасна):
Праўда, дзядулька?!

Дзед Мароз:  
Праўда, унучачка! Трэба толькі, каб дзеці расказалі мне некалькі вершаў пра Новы год, і тады агеньчыкі на нашай елачцы запаляцца абавязкова!

Вядучы:
Чулі, дзеці, што трэба рабіць?! Дапаможам!

 

Дзеці чытаюць вершы.

 

Дзед Мароз:
Ну, малайцы, дзеці! Парадавалі старога! А цяпер я паспрабую ўсё ж запаліць агеньчыкі на нашай ёлачцы (Пляскае ў далоні).

Раз, два, тры –
Ёлачка, гары!

 

Агеньчыкі не запальваюцца.

 

Снягурка:
Дзядулечка! Трэба ж усім разам гэтыя словы гаварыць.

Дзед Мароз:
Ты глядзі! Забыўся! А ну, давайце ўсе разам!

 

Усе разам паўтараюць чарадзейныя словы, на ёлачцы запальваюцца агеньчыкі.

 

Вядучы:
Ну вось, нарэшце наша ёлачка запаліла свае святочныя агеньчыкі! А мы за гэта для яе навагоднюю песню заспяваем.

 

Песня “На санках зімовых”

 

Баба-Яга:
Раз, два, тры! Ёлка, не гары! Раз, два, тры! Ёлка, не гары! (Агеньчыкі па-ранейшаму гараць, Баба-Яга злосна тупае нагой.)

Вядучы:
А зараз, дзеці, я адкрыю вам адзін сакрэт. Спадзяюся, Дзядуля Мароз за гэта на мяне не пакрыўдзіцца.

 

Пачуўшы слова “сакрэт”, Баба-Яга пачынаець падслухоўваць.

 

Вядучы:
А сакрэт вось у чым. У Дзядулі Мароза ў вялікай торбе шмат падарункаў, якія ён вам прынёс. (Баба-Яга падкрадаецца бліжэй) Але, каб атрымаць падарунак, трэба крышачку папрацаваць.

Баба-Яга:
Што? Працаваць? Не-не, гэта не для мяне (выбягае з залы).

Снягурка:
Вось як мы правялі Бабу-Ягу, болей не будзе нам перашкаджаць.

Дзед Мароз:

Ну-ка, дзеці, не сядзіце,
Вясёлы танец пакажыце.

 

Танец “Белая зіма”

 

Дзед Мароз:
Засталося нам толькі падарункі знайсці ды павіншаваць усіх, хто сабраўся ў гэтай зале, з Новым годам.

Снягурка:
Дзядуля, а дзе падарункі? Хіба ты іх у лесе згубіў?

Дзед Мароз:
Ой, хіба…, але нічога, ёсць у мяне цудоўны снежны ком, і вялікая сіла ў ім.
Дружна скажам: “Раз, два, тры, падарункі прынясі!”


Ідзе з комам за дзверы, выносіць падарункі.
Раздаюць падарункі.

 

Дзед Мароз і Снягурка:З Новым годам, сябры! З новым шчасцем! Да пабачэння!

 

Поделиться ссылкой:

Всю ответственность за содержание сведений в методических и информационных материалах, а также за соблюдение авторских прав несут авторы публикаций.

Добавить комментарий