Як праходзіць Год гістарычнай памяці на радзіме славутага беларускага песняра, 140-годдзе якога мы адсвяткавалі надоечы? Якія пытанні хвалююць кіраўніка сістэмы адукацыі Стаўбцоўшчыны напрыканцы каляндарнага года? На гэтыя і іншыя пытанні адказвае начальнік упраўлення па адукацыі, спорце і турызме Стаўбцоўскага райвыканкама Людміла Стонька.
— У Год гістарычнай памяці ва ўстановах адукацыі раёна вялікая ўвага ўдзяляецца захаванню гістарычнай спадчыны і праўды аб усіх перыядах жыцця беларускага народа, — расказвае Людміла Мар’янаўна. — Тым больш што гэта юбілейны год для нашага славутага земляка Якуба Коласа. Дарэчы, 3 лістапада ў Стоўбцах быў адкрыты помнік беларускаму песняру, якога шчыра любяць на малой радзіме. Экспазіцыя “Па слядах Якуба Коласа” (да 140-годдзя з дня нараджэння нашага земляка) Залужскай сярэдняй школы прымала ўдзел у абласной канферэнцыі ў Нясвіжы, у абласных “Дажынках-2021” у Капылі, а таксама ў турыстычным форуме “Спадчына Беларусі”, прысвечаным Году гістарычнай памяці.
Ва ўстановах агульнай сярэдняй і дашкольнай адукацыі раёна створаны выставы па тэме генацыду беларускага народа ў гады Вялікай Айчыннай вайны. Актывізавана музейная работа: кожную апошнюю сераду месяца вучні бясплатна наведваюць музеі Мінскай вобласці, сярод якіх — філіял музея Якуба Коласа, сядзібы “Смольня”, “Альбуць”, “Акінчыцы” і інш.
— З якімі асноўнымі дасягненнямі падыходзіць сістэма адукацыі Стаўбцоўскага раёна да канца 2022 года?
— Новая сярэдняя школа № 4 Стоўбцаў — узор найсучаснейшай установы адукацыі з мультыбордамі ў кожным кабінеце, развіццём робататэхнікі, навучаннем дзяцей пажарнай бяспецы і правілам бяспечных паводзін.
У рамках “Дажынак-2022” мы сур’ёзна палепшылі матэрыяльную базу ўстаноў адукацыі, адрамантавалі фасады школ, добраўпарадкавалі тэрыторыю дзіцячых садоў №№ 1 і 5, сярэдняй школы № 2. І самае важнае — прывялі ў сучасны стан школьныя стадыёны: пабудавалі новы стадыён у гімназіі № 1 Стоўбцаў і надалі сучасны выгляд стадыёну ў сярэдняй школе № 2. Апошняя рэканструкцыя — сумесная з галоўным упраўленнем спорту і турызму аблвыканкама. Таксама Беларуская федэрацыя футбола спансіравала нам уладкаванне сучаснай пляцоўкі па міні-футболе, а Прэзідэнцкі спартыўны клуб выдзеліў сродкі на пабудову шматфункцыянальнай пляцоўкі з вулічнымі трэнажорамі. Лічу, што гэта выдатны напрамак для ўмацавання здароўя дзяцей, развіцця фізічнай культуры і спорту.
16 лістапада, у Міжнародны дзень талерантнасці, мы адкрылі інклюзіўную пляцоўку сумесна з дабрачынным праектам “Крылы шчасця”. Адаптыўная пляцоўка была адкрыта пад патранатам Наталлі Анатольеўны Рыжанковай. Пляцоўкай будуць карыстацца дзеці с асаблівасцямі псіхафізічнага развіцця, каб не адставаць у развіцці ад сваіх здаровых равеснікаў.
Рыхтуем дзяцей да будучага цэнтралізаванага экзамену, арыентуем іх на ўдзел ва ўнутрыўніверсітэцкіх алімпіядах, каб яны сабе змаглі аблегчыць паступленне ва УВА.
— Як наладжана ў раёне работа з маладымі спецыялістамі і з адоранымі навучэнцамі?
— З 21 маладога спецыяліста, якія сёлета прыйшлі да нас на работу, 16 — нашы выпускнікі. Са сваімі працаваць лёгка, бо іх ведаеш яшчэ па школе, удзеле ў алімпіядах. Мы працуем над тым, каб нашы выпускнікі вярталіся ў раён на работу. У бягучым годзе сваім выпускнікам школы выдалі 15 мэтавых накіраванняў на вучобу, каб праз 4 гады атрымаць як мінімум 15 маладых спецыялістаў у сваіх установах адукацыі.
Мая мара — каб Стаўбцоўскі раён гучаў заўсёды толькі са станоўчага боку, каб нашы дзеці напоўніцу атрымлівалі ўсё, што можа ім прадаставіць дзяржава і сістэма адукацыі, і каб пасля яны прымянялі свае веды на карысць малой радзімы.
Я сама ўраджэнка Стаўбцоўшчыны, скончыла Засульскую сярэднюю школу. І з першага працоўнага дня (пасля заканчэння педагагічнага вучылішча і Гродзенскага дзяржаўнага ўніверсітэта імя Янкі Купалы) для мяне важны мой раён, дзе мае веды і вопыт спатрэбіліся людзям. Не баюся прызначаць на пасады кіраўнікоў маладых педагогаў. Ужо два гады ў нас працуе малады дырэктар Налібоцкай сярэдняй школы Сяргей Андрэевіч Новікаў. Ён два гады працаваў настаўнікам гісторыі, а зараз з’яўляецца кіраўніком установы адукацыі. Скажу так: у маладога дырэктара вочы гараць, яму хочацца спазнаваць новае, вучыцца.
Па выніках ЦТ 2022 года 4 выпускнікі Стаўбцоўскага раёна маюць 100-бальны вынік. Нашы дзеці вучацца ў Нацыянальным дзіцячым тэхнапарку. Ягор Аммер, вучань Засульскай сярэдняй школы, прайшоў навучанне ў НДТ па напрамку “Інфармацыйныя і камп’ютарныя тэхналогіі”. З 6 снежня 2022 года ў тэхнапарк залічаны Паліна Сяменчанка з Коласаўскай сярэдняй школы і Юлія Грыгарцэвіч з Дзераўнянскай сярэдняй школы (па адукацыйных кірунках “Інфармацыйная бяспека” і “Энергетыка будучыні”).
— Раскажыце пра супрацоўніцтва з бацькамі навучэнцаў і сацыяльнымі партнёрамі?
— У нашых установах адукацыі рэалізуецца праект “Бацькоўскі ўніверсітэт”, мы актыўна ўдзельнічаем у абласным трэвэл-праекце “Сямейны дыліжанс”. Лічу, што адна з найбольш дзейсных форм работы з бацькамі — сямейныя клубы, іх у нас 13 у 12 установах адукацыі.
Мясцовыя ўлады таксама заўсёды трымаюць сістэму адукацыі ў полі зроку. Сродкі на яе падтрымку заўсёды знаходзяцца. Акрамя таго, у нас ёсць добрая практыка шэфскай дапамогі. Па традыцыі кіраўнікі гаспадарак за работу ў летні перыяд уручаюць прэміі нашым вучням. Ёсць гаспадаркі, якія прэміруюць дзяцей па выніках навучальнага года. Так, ААТ “Жацерава” ўручае прэміі навучэнцам Горкаўскай сярэдняй школы. ААТ “Рубяжэвічы” ўжо выплаціла грашовыя прэміі 11 выдатнікам Рубяжэвіцкай сярэдняй школы ў памеры 3 базавых велічынь. Няхай сумы і невялікія, але гэта грошы, заробленыя інтэлектуальнай працай.
— Што плануеце арганізаваць у рамках акцыі “Нашы дзеці”?
— Акцыя “Нашы дзеці” ў раёне заўсёды праходзіць маштабна, бо мы падводзім вынікі работы з адоранымі дзецьмі, уручаем ім грашовыя прэміі. Часам іх памер даходзіць да 300—350 рублёў! Асобна праводзім навагоднія мерапрыемствы для дзяцей, якія знаходзяцца ў сацыяльна небяспечным становішчы, дзяцей з мнагадзетных і малазабяспечаных сем’яў. З раённага бюджэту ў рамках акцыі будзе выдаткавана каля 30 тысяч рублёў. Старшыня райвыканкама сам штогод наведвае мнагадзетную сям’ю ці аддзяленне сацыяльнага прытулку, прыёмную сям’ю або дзіцячы дом сямейнага тыпу, каб кожнае дзіця атрымала навагоднія падарункі і святочны настрой.
Гутарыла Наталля КАСТЭНКА.
Фота Аляксандра ПЯТРОВА.
Предложить публикацию