Занятак для дзяцей 4-5 гадоў “Сінічка-невялічка” па адукацыйнай галіне“Выяўленчае мастацтва” (лепка)
Ларыса ЖЫНКО,
выхавальнік дашкольнай адукацыі,
ДУА “Уселюбская сярэдняя школа” Навагрудскага раёна,
Гродзенская вобласць
Праграмныя задачы:
– фарміраваць уменні выдзяляць адметныя асаблівасці сініцы: афарбоўку, будову;
– развіваць уменні выкарыстоўваць прыёмы нетрадыцыйнай тэхнікі лепкі – пластылінаграфіі;
– выхоўваць беражлівыя адносіны да птушак.
Матэрыялы: пісьмо-загадка, малюнак сінічкі, набор пластыліну, стэкі, контур сінічкі на кардоне, дошка для раскачвання пластыліну, сурвэткі.
Ход занятку
І Арганізацыйны момант
Выхавальнік: Добры дзень, дзеці! Сталі ўсе ў круг, узяліся за рукі і павіталі адно аднаго ўсмешкай.
Сёння па дарозе ў дзіцячы сад паштальён даў мне пісьмо-загадку:
Між дрэў я лётаю
Розных мошак збіраю.
У кусціках ежу шукаю,
Крошкі хлеба падбяру.
Кемлівая птушка
І завуць мяне…
(Сінічка)
Якая зараз пара года? Які корм можа знайсці сінічка зімой? (Адказы дзяцей). Зімой птушкам холадна і голадна. З раніцы да вечара яны шукаюць сабе пракорм. Якую дапамогу зможам аказаць птушкам? (Адказы дзяцей).
Правільна, павесіць кармушкі і насыпаць для іх розны корм: зерне, семкі. А я, адкрыю вам сакрэт: сінічкі вельмі цікаўныя, вёрткія, рухавыя птушкі і вельмі любяць сала.
ІІ Асноўная частка
Выхавальнік паказвае ілюстрацыю з выявай птушкі.
Выхавальнік: Як выглядае сініца? Якога колеру пёркі ў яе на галаве, спінцы, грудцы, крылах, хвасце?
Гульня “Назаві часткі цела птушкі”
Выхавальнік: З якіх частак складаецца цела птушкі? Якая частка цела самая вялікая (маленькая), якой формы? Давайце разам з птушкай сінічкай павесялім яе і паскачам.
Фізкультхвілінка
Птушкі скачуць, лётаюць (дзеці скачуць)
Крошкі птушкі збіраюць.(“дзяўбуць”)
Пярынкі пачысцілі,
Дзюбы пачысцілі(“чысцяцца”)
Птушкі лятаюць, спяваюць (махаюць рукамі)
Дзяўбуць зярняткі (нахіляюцца)
Далей паляцелі
І на месца селі (“ляцяць”, садзяцца)
ІІІ Практычная частка
Выхавальнік: Як весела стала. Давайце хутчэй з дапамогай пластыліну “намалюем” сінічцы сяброў, бо ёй цяжка адной перазімаваць. У нашай групе будзе жыць цэлая зграя гэтых дзіўных птушак. Перад тым як пачнём, давайце разам узгадаем алгарытм працы з пластылінам у тэхніцы пластылінаграфіі:
1) адшчыпнуць маленькі кавалачак пластыліну;
2) размяць пластылін;
3) нанесці пластылін на выяву птушкі, якая размешчана на кардоне;
4) расцягнуць яго на кардоне.
Выхавальнік: Для таго каб наша сінічка атрымалася прыгожай, нам неабходна падрыхтаваць нашы пальчыкі да працы.
Пальчыкавая гімнастыка (па выбары выхавальніка)
Выхавальнік: Успомнім, якімі колерамі пластыліну будзем карыстацца (галава – чорная, шчочкі – белыя, спінка – жоўта-зялёная, брушка – жоўтае, хвост і крылы – блакітныя, вочкі – белыя кропкі). А зараз ажывім нашу сінічку.
Выхавальнік у пакрокавым тлумачэнні вырабляе свой уласны малюнак (наглядны ўзор) і тлумачыць дзецям заданне. Спачатку неабходна адлюстраваць галаву, з усімі яе часткамі (вочы, дзюбу). Потым малюем крылы, спінку і хвосцік. Затым пераходзім да грудкі. Лапкі робім са жгуцікаў. Пластылін раскатваем жгуцікамі і наляпляем па контуры. Працуем ад светлага колеру да цёмнага.
Выхавальнік аказвае дапамогу, хваліць.
Выхавальнік: Дзеці, а зараз выйдзіце з птушкамі і давайце палюбуемся, якія выдатныя сінічкі ў нас атрымаліся! І мая сінічка-сястрычка вельмі рада, што ў яе з’явілася шмат сяброў!
Давайце праспяваем песеньку сінічкі, трэніруючы дыханне. Глыбока ўдыхніце, выцягніце рукі ў бакі і зноў апусціце рукі, на выдыху прамаўляючы “Сінь-цень” – гэта песенька сінічкі. Паўтараем некалькі разоў.
ІV Заключная частка
Вынікам занятку становіцца выстава гатовых работ дзяцей.
Выхавальнік: Давайце ўзгадаем, як мы дапамагаем зімуючым птушкам выжыць у зімовыя халады? Правільна, мы зрабілі кармушкі для птушак і кожны дзень падкормліваем іх, каб яны не галадалі. Сёння на прагулцы пакормім сінічак, вераб’ёў і іншых птушачак, якія прылятаюць да нас на ўчастак.
Предложить публикацию