Фарміраваць веды дзяцей пра свята Вялікдзень; далучаць да гісторыі і традыцый сваёй Радзімы.
Таццяна ДАЎЛЯШЭВІЧ,
выхавальнік дашкольнай адукацыі
ДУА “Дзіцячы сад аг.Геранёны”, Іўеўскага раёна,
Гродзенская вобласць
Тэма: “Упрыгожым куліч”
Праграмныя задачы:
– фарміраваць веды дзяцей пра свята Вялікдзень; далучаць да гісторыі і традыцый сваёй Радзімы;
– замацоўваць навыкі малявання нетрадыцыйнымі спосабамі: ватнымі палачкамі, паралонавымі штампамі, мятай паперай;
– развіваць эмацыянальна пазітыўнае стаўленне да працэсу і выніку малявання;
– выхоўваць любоў і павагу да народных традыцый і свят беларускага народа;
– выхоўваць устойлівую цікавасць да малявання.
Папярэдняя работа: гутарка пра свята Вялікдзень, абрадавыя гульні “Біткі”, “Качанне яек”, “На паляўнічы спрыт”, разгляданне сюжэтных малюнкаў на тэму “Вялікдзень”.
Матэрыялы і абсталяванне: касцюмы валачобнікаў, 2 велікодныя яйкі для гульні, велікодныя кулічы (сілуэты), ватныя палачкі, паралонавыя штампы, папера (10×15), гуашавыя фарбы, вільготныя сурвэткі, музычнае суправаджэнне.
Ход занятку
Арганізацыйны момант. Прывітанне
Выхавальнік.
Усіх да нас я запрашаю!
I сардэчна вас вітаю –
І дарослых, і дзяцей,
І шаноўных усіх гасцей.
Шанаванне добрым людзям
Хай вам радасці прыбудзе!
Асноўная частка
Размова “Свята Вялікдзень”
Выхавальнік. Рабяты, Вялікдзень, або Пасха, з’яўляецца самым значным і ўрачыстым народным святам. Напярэдадні свята старанна прыбіралі ў хаце, рыхтавалася святочная страва, абавязкова фарбаваліся яйкі. Яйкі з’яўляліся вельмі важным атрыбутам свята. Яны сімвалізавалі жыццё. Паўсюль па вёсках у першыя дні хадзілі валачобнікі, гаспадары частавалі валачобнікаў стравамі са святочнага стала.
Раздаецца стук у дзверы. Пад музыку заходзяць валачобнікі, у руках трымаюць кошыкі.
Валачобнік 1. На першы дзень, на Вялікдзень валачобнікі збіраліся.
Валачобнік 2.
Валачобнікі – людзі добрыя,
Небывалыя, пажаданыя,
Нячаста ходзім, нямнога просім,
Толькі ў гадочак адзін разочак!
Валачобнік 1.
У гэта вялікае свята – Вялікдзень
Ды пойдзем да першага двара.
Ці запросяць да гаспадарскага стала?
3 чырвоным яйкам, з цёплым акенечкам.
Валачобнік 2.
А мы ідзём, ідзём пад багаты дом,
Пад багаты дом “Дзень добры!” даём
Дзень добры таму, хто ў гэтым даму.
Выхавальнік. Дзень добры, шаноўныя людзі! З чым вы да нас завіталі?
Валачобнік 1. У час свята Вялікдзень праводзіцца шмат забаў, гульняў, і ў адну з іх мы хочам з вамі пагуляць. Станавіцеся дзеці ў круг. У мяне для вас ёсць сюрпрыз (дастае з кошыка 2 чырвоныя яйкі). Дзеці, а што гэта ў мяне?
Дзеці. Велікодныя яйкі.
Валачобнік 1. Правільна, гэта велікодныя яйкі. Пагуляем з імі?
Гульня-карагод “Каціся, яечка” (пад музыку)
“Каціся, каціся, яечка, па нашаму кружочку
Найдзі, найдзі, яечка, для сябе дружочка.”
Як заканчваюцца словы, тыя, у каго ў руках засталіся яйкі, выходзяць у цэнтр круга, аддаюць валачобніку яйкі, той гаворыць словы: “У круг выходзьце і для нас патанцуйце”.
Дзеці танцуюць па-адным ці ўдвух, астатнія пляскаюць у далоні. Гульня паўтараецца 2–3 разы.
Выхавальнік. Дзякуй, вам, паважаныя валачобнікі, за гульню.
Рабяты, калі заходзяць у хату валачобнікі, гаспадары іх заўсёды частуюць. А чым жа мы з вамі іх можам пачаставаць? А давайце мы для валачобнікаў падрыхтуем падарункі. Я прапаную размаляваць велікодныя кулічы.
Выхавальнік. Сядайце, калі ласка, на свае месцы.
Дэманстрацыя спосабу малявання
Выхавальнік. Спачатку мы будзем замалёўваць верхнюю частку куліча, гэта мы будзем рабіць ватнай палачкай і выкарыстоўваць сінюю, зялёную і чырвоную фарбы (паказ). 3атым паралонавым штампам замалюем ніжнюю частку куліча жоўтай фарбай (паказ). Яйкі замалюем чырвонай фарбай з дапамогай мятай паперы (паказ).
Выхавальнік. А перад тым як пачнём маляваць, мы павінны падрыхтаваць свае рукі. Вазьміце лісток паперы, устаньце каля крэслаў.
Пальчыкавая гімнастыка
Ліст паперы мы сціскаем!
I далонькі размінаем!
Мы стараемся, качаем,
Дружна ў шар ператвараем!
Не дадзім ім сумаваць
Імі будзем маляваць!
Праца за сталамі
Выхавальнік. Ціха прыселі, спіны роўненька, ногі разам. A цяпер з добрым настроем пачынаем маляваць.
Паўторная пакрокавая інструкцыя. Пад музыку дзеці самастойна замалёўваюць кулічы. Па неабходнасці выхавальнік дапамагае таму, у каго не атрымоўваецца.
Гатовыя малюнкі дзеці прымацоўваюць на стэнд і разглядаюць велікодныя кулічы.
Малайцы! Давайце палюбуемся нашымі велікоднымі кулічамі. Які з іх самы акуратны (прыгожы, яркі, цікавы)? А вы памятаеце, для чаго мы малявалі такія прыгожыя кулічы? Што было для вас самым складаным? (Адказы дзяцей) Малайцы, усе вельмі пастараліся. Цяпер мы складзём нашыя кулічы ў прыгожую каробку і падорым нашым гасцям.
Валачобнік 2. Дзякуй вам, рабяты, за такія прыгожыя кулічы і за вясёлы настрой. Давайце з вамі разам станцуем карагод.
Карагод пад песню “Вясна-красна”
Валачобнік 2. А за тое, што вы стараліся, мы для вас прынеслі пачастункі. (Аддаюць карзіны выхавальніку з пачастункамі).
Валачобнік 1.
Нам ужо пара
Да другога двара
Чакайце нас на наступны год.
Да пабачэння!
Валачобнікі пад музыку выходзяць.
Выхавальнік. Рабяты, давайце развітаемся з нашымі гасцямі. Да пабачэння!
Предложить публикацию