Падарожжа па краіне пажарнай бяспекі. Канспект занятку па адукацыйнай галіне “Дзіця і грамадства”
Людміла ЧАМЕРКА,
выхавальнік рознаўзроставай групы
ДУА“Гарадзечненская сярэдняя школа”
Навагрудскага раёна,
Гродзенская вобласць
Мэта: сфарміраваць у выхаванцаў свядомыя і адказныя адносіны да выканання правіл пажарнай бяспекі.
Задачы:
– сярэдняя група: працягваць фарміраваць веды пра пажарную бяспеку; замацоўваць веды пра агонь і яго ўласцівасці, пра прадметы, якія могуць з’яўляцца прычынай пажару, пра карысць і шкоду агню, пра прадметы, якімі можна і нельга тушыць пажар;
– старшая група: замацаваць правілы супрацьпажарнай бяспекі і правільныя дзеянні ў выпадку ўзнікнення пажару; развіваць увагу, лагічнае мысленне, памяць, мову; выхоўваць жаданне дапамагаць іншым.
Матэрыял: карткі да гульні “Апішы агонь”; сюжэтныя карткі да выставы “Агонь сябар – агонь вораг” (фотагалерэя); паштоўка; мяч да гульні “Небяспечныя прадметы”; прадметы, якімі можна (нельга) тушыць пажар (вядро з вадой, вядро з пяском, лапатка, пакрывала, цацачны вогнетушыцель, венік, газета, каністра дзіцячая, тканіна); медалі “Адважны пажарны”.
Папярэдняя работа: разглядванне ілюстрацый па пажарнай бяспецы, гутаркі на тэму: “Агонь сябар – агонь вораг”, “Небяспечныя прадметы”, “Правілы паводзін з агнём”, экскурсія ў пажарную часць.
Ход занятку
1 Арганізацыйны момант
Псіхагімнастыка “Агеньчык”
– Дзеці ў мяне сёння вельмі радасны настрой. І я хачу ім падзяліцца з вамі. Вось ён, сапраўдны агеньчык. Давайце перададзім яго адно аднаму. Які ў вас цяпер стаў настрой? (Адказы дзяцей).
2 Асноўная частка
– Дзеці, сёння мы будзем гаварыць на вельмі важную тэму, а вось на якую, вы здагадаецеся, калі адгадаеце маю загадку:
Магу я добрым быць парою,
Ваш дом нагрэю я зімою.
Калі са мною возьмуцца гуляць –
Магу пажарам хутка стаць! (Агонь)
– Так, мы будзем размаўляць пра агонь і пажарную бяспеку. А для гэтага я вам прапаную адправіцца ў падарожжа па краіне “Пажарнай бяспекі”. Згодны?
Сюрпрызны момант (з’яўляецца Лісічка і плача)
– Лісічка, што з табою здарылася?
– Я вырашыла пагрэцца ля кастра і абпаліла сабе лапку. Дрэнны гэты агонь!
– Лісанька, мы адпраўляемся ў падарожжа па краіне “Пажарнай бяспекі”. Паедзем з намі, мы табе паведамім правілы паводзін з агнём і навучым быць з ім асцярожнай. А паедзем мы на цягніку. Дзеці, наш цягнік адпраўляецца, сядаем у вагончыкі (дзеці трымаюцца адно за аднаго і пад музыку рухаюцца па групе).
Станцыя 1. “Апішы агонь”
– Дзеці агонь мы будзем апісваць пры дапамозе картак. Вам трэба выбраць тую картку, якая дапаможа вам апісаць агонь.
Вожык – калючы
Крапіва – пякучы
Памідор – чырвоны
Апельсін – аранжавы
Пяро – пяшчотны
Кіпячы чайнік – гарачы
Вялікая матрошка – вялікі
Маленькая матрошка – маленькі
Трашчотка – траскучы
Смайл з выявай злосці – злы.
– Яраслаў, якую картку ты выбраў? Чаму?
– Вось, Ліска, колькі шмат розных слоў можна сказаць пра агонь.
– Адпраўляемся далей (пад музыку).
Станцыя 2. Фотагалерэя “Агонь сябар – агонь вораг”
– Вось мы і апынуліся ў фотагалерэі. Але ж аформіць яе мы павінны самі. Для гэтага нам неабходна выбраць фотаздымкі, на якіх агонь – сябар, і на якіх – вораг.
– Агонь бывае вялікі і маленькі, карысны і небяспечны. Навошта людзі разводзяць касцёр? Для чаго нам патрэбны агонь? (Каб грэцца, гатаваць ежу, паліць смецце і г.д.).
– Давайце разгледзім, якія фотаздымкі вы выбралі. Адзначым дзе агонь – вораг, а дзе ён сябар. Малайцы, а зараз сядаем у вагончыкі і адпраўляемся далей.
Станцыя 3. “Незвычайны аганёк” (гульня з мячом)
– Давайце з вамі пагуляем з мячыкам – агеньчыкам, я буду кідаць вам мяч, а вы мне называць прадметы, якія могуць з’яўляцца прычынай пажару (тэлевізар, прас, запалкі, разетка, свечка, газавы балон, печка, газавая пліта, праводка і г.д.).
– Дзеці, вы згодныя?
– Едзем далей! (Пад музыку).
Станцыя 4. “Будзь уважлівым”
– Дзеці, я знайшла паштоўку! (з урыўкам верша “Путаница” ці відэапаштоўка)
А лисички взяли спички,
К морю синему пошли,
Море синее зажгли.
Долго, долго крокодил
Море синее тушил
Пирогами и блинами,
И сушёными грибами.
– Як вы лічыце, правільна героі верша тушылі пажар?
– Давайце з вамі паглядзім уважліва на стол, колькі тут розных прадметаў. Нам неабходна іх падзяліць на прадметы, якімі можна тушыць, а якімі нельга тушыць пажар. Яна і Яраслаў……., вам трэба выбраць тыя прадметы, якімі можна патушыць пажар, а Ліза і Даша…….., вам трэба выбраць тыя прадметы, якімі нельга тушыць пажар (вада, пясок, вогнетушыцель, запалкі, пірагі, папера, бліны, грыбы).
Станцыя 5. “Машыны спецыяльнага назначэння”.
– Паглядзіце, якая незвычайная машына. Хто здагадаўся, як яна называецца? (Пажарная машына).
– Дзеці, падкажыце мне, калі ласка, як называецца машына, якая тушыць пажар?
– А як вы думаеце, чаму яна так называецца?
– Правільна, ад слова “пажар” яе называюць пажарнай машынай, а людзі, якія тушаць пажар, – пажарныя.
– А якога колеру машына? (Чырвоная).
– Чаму пажарныя машыны заўсёды чырвонага колеру?
– А як едзе пажарная машына, хутка ці марудна?
Выхавальнік абагульняе адказы выхаванцаў: “Пажарная машына – гэта машына спецыяльнага назначэння. Яна заўсёды чырвонага колеру, каб яе было відаць здалёк. Чырвоны колер – колер агню. Едзе пажарная машына хутка, каб паспець патушыць агонь і выратаваць людзей”.
Мчится красная машина
Всё быстрей, быстрей вперёд!
Командир сидит в кабине
И секундам счёт ведёт.
– Поднажми ещё немножко, –
Он шофёру говорит, –
Видишь, в пламени окошко?
Это дом жилой горит.
Может, там остались дети,
Люди ждут с надеждой нас…
– Ясно всё, – шофёр ответил,
Дав машине полный газ.
К.Оленев.
– Калі машына едзе па дарозе, яе не толькі відаць, але і чуваць сірэну. Як вы думаеце, чаму яна так моцна гучыць?
– Правільна, каб іншыя машыны чулі гукавы сігнал і ўступалі пажарнай машыне дарогу.
– Дзеці, давайце дамовімся, што вы заўсёды будзеце выконваць правілы пажарнай бяспекі, каб пажарная машына ніколі не прыязджала да вашага дому. Помніце, пажар лягчэй папярэдзіць, чым патушыць.
– Дзеці, скажыце, калі пажар ужо здарыўся, па якім нумары мы можам пра гэта паведаміць? (101, 112).
Дыдактычная гульня “Складзі карцінку”. (Прапаную выхаванцам для замацавання ведаў, атрыманых на занятку, скласьці пазлы па тэме)
3 Вынік занятку
– Малайцы! Дзеці, вам спадабаўся наш занятак? Штосьці было цяжкім?
– Вы мне таксама спадабаліся.
– Лісанька, а ты зразумела, як трэба сябе паводзіць з агнём?
– Давайце яшчэ раз успомнім па малюнках правілы пажарнай бяспекі:
– Не браць і не гуляць з запалкамі;
– Не лезці прадметамі ў разеткі;
– Не падыходзіць да газавай пліты;
– Не ўключаць дзецям прас і другія электрапрыборы;
– Пры пажары тэлефанаваць па нумары – 101;
– І давайце успомнім, як правільна выклікаць пажарных?
– А зараз я хачу падарыць вам падарункі, медалі “Адважныя пажарныя”.
Предложить публикацию