У ходзе занятку дзеці даведаюцца пра ўласцівасці снегу, навучацца ўстанаўліваць простыя прычынна-выніковыя сувязі і маляваць ватовымі палачкамі сняжынкі.
Наталля ЕРМАКОВІЧ,
выхавальнік дашкольнай адукацыі
ДУА “Навадворскі дзіцячы сад Свіслацкага раёна”,
Гродзенская вобласць
Праграмныя задачы:
– працягнуць фарміраваць уяўленні дзяцей пра ўласцівасці снегу (белы; халодны; мокры снег можна ляпіць, а сухі нельга; у цяпле снег растае), вучыць устанаўліваць простыя прычынна-выніковыя сувязі, адказваць на пастаўленыя пытанні;
– развіваць цікавасць да эксперыментавання, слыхавую і зрокавую ўвагу, пачуццё колеру і рытму, дробную маторыку, актывізаваць слоўнік, стварыць станоўчы эмацыйны настрой у групе;
– выхоўваць цікавасць да пазнання прыроды і адлюстравання сваіх уражанняў у выяўленчай дзейнасці.
Матэрыялы да занятку: пакет з крухмалам, узор сняжынкі, лісты сіняй паперы, гуаш белага колеру, снег, шкляначка, мячык, ватовыя палачкі.
Папярэдняя праца: назіранне за сняжынкамі, разглядванне іх на прагулцы, чытанне вершаў, загадак, прагляд ілюстрацый, зімніх пейзажаў.
Ход занятку
Стварэнне добразычлівай атмасферы – прыём “Камплімент”
Выхавальнік: Давайце станем у круг, будзем перадаваць мячык з усмешкай і называць ласкава імя суседа і гаварыць яму прыемныя словы. Я буду першай: “Імя дзіцяці, ты вельмі хуткі, прыгожы і разумны хлопчык”.
Сюрпрызны момант “Скрып снегу”
На камп’ютары гучыць запіс “Скрып снегу”.
Выхавальнік: Што гэта за гук? Дзеці, да нас, напэўна, хтосьці спяшаецца. Хто гэта можа быць? (Дзед Мароз, Снягурачка, снегавік, зіма …).
Я вам зараз прачытаю загадку, і вам адразу стане зразумела, хто да нас спяшаецца на занятак.
Вось вам, дзеці, верш зімовы.
Падкажыце ў вершы словы.
Зімой даліны і сцяжынкі
Пакрылі белыя … (сняжынкі).
Выхавальнік: Правільна, гэта сняжынка (выстаўляю макет сняжынкі).
Сняжынка на працягу ўсяго занятку будзе з намі. Яна падрыхтавала для вас заданні, і мы будзем размаўляць, эксперыментаваць, маляваць, гуляць.
Разглядванне і эксперыментаванне “Што такое снег?”
Прапаную дзецям сесці на дыван.
Выхавальнік: Дзеці, скажыце, якая пара года зараз? (Зіма). Правільна, зіма. А што для вас зіма?
Дзеці: Белы снег, свята Новы год, падарункі, Дзед Мароз, лыжы, санкі.
Выхавальнік: Якія вершы вы ведаеце пра зіму?
Дзіця чытае верш, астатнія апладзіруюць. Выхавальнік прапануе дзецям перайсці за сталы, на якіх ляжыць на талерках снег, стаяць аднаразовыя шкляначкі.
Выхавальнік: Дзеці, а які ён, снег?
Дзеці: Белы, халодны, ледзяны, чысты.
Выхавальнік: Снег нам здаецца вельмі чыстым. Давайце разгледзім яго ўважліва. Вы ўжо не раз бралі яго ў рукі, калі гулялі на вуліцы. Давайце паназіраем, што станецца са снегам, калі пакласці на далонь.
Выхавальнік кладзе на далоньку кожнаму дзіцяці трохі снегу, і ўсе назіраюць, што адбываецца.
Выхавальнік: Куды знік снег з вашых рук?
Дзеці: Растаў.
Выхавальнік: Чаму ён растаў? Разгледзьце ваду, у якую ператварыўся снег у шкляначцы. Ці чыстая яна? Апусціце ў шклянку палец і скажыце, якая ў ім вада? (Халодная).
Выхавальнік: Зараз растлумачце, чаму нельга есці снег?
Дзеці: Снег брудны, з мікробамі, халодны, можа балець горла, захварэеш.
Выхавальнік: А многія з вас на прагулцы бяруць снег у рот, думаюць, што гэта марожанае. Марожанае прадаецца ў магазіне, можна самім зрабіць марожанае дома, а снег шкодны для здароўя і гэта небяспечна.
Праблемная сітуацыя “Чаму снег рыпіць?”
Выхавальнік прапануе дзецям падысці да стала, на якім ляжыць пакецік з крухмалам. Выхавальнік просіць дзяцей закрыць вочы і націскае рукой на пакет.
Выхавальнік: Што нагадвае вам гэты гук? (Рыпенне снегу).
Выхавальнік: Правільна. Снег рыпіць, калі на вуліцы моцны мароз. Пры моцным марозе снег не лепіцца.
Прапаную дзецям націснуць на пакет.
Выхавальнік: Калі на вуліцы надвор’е не вельмі халоднае, то снег ліпкі. Чым тады любяць займацца дзеці? (Адказы дзяцей).
Вывад пра ўласцівасці снегу: снег можа быць сухім і мокрым. Мокры снег можна ляпіць, а сухі нельга. Снег у цяпле растае і ператвараецца ў ваду.
Фізхвілінка “Зіма”
Зіма хадою смелаю
Да нас прыйшла здаля,
(крочаць на месцы)
І стала белай-белаю
Уся вакол зямля
(разводзяць рукі ў бакі).
Такія гурбы выраслі,
Як прывіды стаяць
(паднімаюць рукі ўверх).
На двор мы лыжы вынеслі –
Давай гуртом з’язджаць
(пляскаюць у далоні).
І хутка-хутка з горачкі
На лыжах мы ляцім
(імітуюць язду на лыжах).
Не холадна ніколечкі –
Нам весела ўсім
(пляскаюць у далоні).
Моўнае практыкаванне з мячом
Патрабую канкрэтных адказаў дзяцей.
Выхавальнік:
– Снег рыпіць пад нагамі, як… (сухая галінка);
– Сняжынкі падаюць ціха, як… (пярынкі);
– Мяцеліца завывае, як… (воўк);
– Вецер свішча, як… (чалавек);
– Што ўмее рабіць снег? (Падаць, кружыцца, ляцець, бліскацець, скрыпець, раставаць);
– Што ўмеюць рабіць санкі? (Стаяць, з’язджаць, бегчы, перакульвацца).
Гульня “Закончы сказ” і перадай наступнаму
У нашым выпадку перадаецца сняжынка, якая прысутнічае на занятку. Дзіця адказвае на пытанне і перадае наступнаму для чарговага пытання ад выхавальніка.
– На вуліцы ў рабят пачырванелі шчокі, таму што… (быў моцны мароз);
– Вечарам зімой рана цямнее, таму што… (дні сталі карацейшыя);
– Зімой весела, таму што… (можна катацца на санках, гуляць у снежкі, ляпіць снегавіка);
– Без цёплага адзення нельга выходзіць на вуліцу, таму што… (можна захварэць);
– На вуліцы зімой прыгожа, таму што… (усё пакрыта белым покрывам, лятаюць у паветры сняжынкі).
Практычная частка
Выхавальнік: Рабяты, наша Сняжынка засумавала, бо яна адна, без сябровак. Давайце ўсе разам створым чараўніцтва і намалюем для сняжынкі сябровак.
Сёння мы будзем маляваць сняжынкі ватовымі палачкамі. Разгледзім узор. Паказваю, як правільна маляваць. Прапаную дзецям намаляваць сняжынкі, як у мяне. Уключаю музыку, і дзеці пачынаюць маляваць. Індывідуальна дапамагаю тым дзецям, у каго не атрымліваецца. Перад практычнай дзейнасцю праводжу пальчыкавую гімнастыку.
Пальчыкавая гімнастыка
Гэты пальчык – дзядуля,
Гэты пальчык – бабуля,
Гэты пальчык – татачка,
Гэты пальчык – матуля,
Гэты пальчык – я.
Выстава малюнкаў, падвядзенне выніку
Гатовыя малюнкі размяшчаю на выставе. Прапаную дзецям падысці і палюбавацца, якія выдатныя малюнкі атрымаліся.
Выхавальнік:
– Давайце ўспомнім, пра што мы гаварылі на занятку?
– Што вам найбольш спадабалася?
– Які ў вас настрой?
Псіхагімнастыка
Выхавальнік: Зараз кожны з вас стане сняжынкай. Закрыйце вочы… Уявіце, што вы – маленькая сняжынка. Раптам падзьмуў вецер – і сняжынкі падняліся высока ў паветра, закружыліся. Сціх вецер – і сняжынкі супакоіліся і апусціліся ціха на зямлю.
Предложить публикацию