×

Адкрылі экалагічны клас

21.01.2020 10:50,

Навучэнцы гімназіі Глуска даўно займаюцца даследчай дзейнасцю ў галіне экалогіі. Нядаўна ў мясцовых хлопчыкаў і дзяўчынак з’явіліся новыя магчымасці для экалагічных даследаванняў. У гімназіі ўрачыста адкрылі экалагічны клас.

— Дзякуючы энтузіязму настаўніцы біялогіі Т.У.Сачанка, у нашай навучальнай установе вялікая ўвага ўдзяляецца экалагічнаму выхаванню. І гэта прыносіць свой плён. Дзеці не проста ведаюць правілы беражлівых адносін да прыроды, эканоміі энергетычных рэсурсаў — яны самастойна шукаюць спосабы паляпшэння экалагічнага стану навакольнага асяроддзя. За апошнія некалькі гадоў даследаванні нашых вучняў былі адзначаны шматлікімі прызавымі дыпломамі разнастайных конкурсаў біёлага-экалагічнага напрамку. Прычым усе эксперыменты і доследы праводзіліся прымітыўнымі метадамі. Спецыяльнага абсталявання для даследаванняў нам вельмі неставала, таму адкрыццё сучаснага экалагічнага класа стала для нашай установы значнай падзеяй, — расказаў дырэктар гімназіі С.Я.Сяргееў.

Адкрыццю экалагічнага класа паспрыяла істотная спонсарская дапамога ад беларуска-аўстрыйскай кампаніі “Кранаспан”. На выдзеленыя сродкі ў памеры 13 тысяч беларускіх рублёў быў набыты электронны мікраскоп, разнастайныя электронныя вымяральныя прыборы, хімічныя рэактывы, ноўтбук, каляровы прынтар, інтэрактыўная дошка, стэнды, табліцы і іншыя патрэбныя для даследчай работы рэчы.

Кіраўніцтва ўстановы ўпэўнена: адкрыццё экалагічнага класа дапаможа вывесці даследчую дзейнасць навучэнцаў на якасна новы ўзровень. Сучаснае абсталяванне дапаможа павысіць матывацыю дзяцей да вывучэння экалогіі і біялогіі, а таксама палепшыць якасць і перспектыўнасць дзіцячых даследаванняў.

Ганна СІНЬКЕВІЧ.
Фота прадастаўлена ўстановай адукацыі.