Прыгожыя аплікацыі сваімі рукамі

Самыя маленькія выхаванцы ясляў-сада вескі Беняконі Воранаўскага раёна працавалі на працягу дня, каб упрыгожыць групавы пакой сваімі рукамі.

Выяўленчая дзейнасць, а ў прыватнасці аплікацыя, мае вялікае значэнне ў вырашэнні задач эстэтычнага выхавання дашкольнікаў, бо ўплывае на ўсебаковае развіццё і выхаванне дзяцей. Такая дзейнасць дапамагае развіццю і фарміраванню зрокавага ўспрымання, уяўлення, прасторавых прадстаўленняў, памяці, пачуццяў і іншых псіхічных працэсаў. Падчас працы фарміруюцца такія ўласцівасці асобы, як настойлівасць, мэтанакіраванасць, акуратнасць, працавітасць.

Раніцаю малыя размалявалі белыя лісты паперы ў блакітна-сіні колер, каб потым стварыць хвалі, разрываючы ліст на некалькі доўгіх кавалачкаў. На занятку па мастацкай дзейнасці выхаванцы выканалі аплікацыю “Карабель”. Спачатку да ліста паперы прыклеілі фігуру ў форме трапецыі, гэта была аснова будучага карабля. А парус складаўся ў іх з двух трохвугольнікаў рознай велічыні. Увечары свае караблі дзеці прыклеілі да шпалеры. Вакол караблеў выклалі хвалі, зверху – хмаркі.

Ствараючы прыгожыя аплікацыі сваімі рукамі, бачачы вынік сваёй працы, дзеці атрымліваюць станоўчыя эмоцыі. Праца з паперай дае ім магчымасць праявіць цярпенне, упартасць, фантазію і густ. Выхаванцам вельмі прыемна ўпрыгожваць групавы пакой сваімі працамі.

Юлія УЛАНОЎСКАЯ
выхавальнік дашкольнай адукацыі
ясляў-сада в.Беняконі
Воранаўскага раёна