Праграма веснавога лагера “Званочкі дабрыні” Нягневіцкай сярэдняй школы Навагрудскага раёна складзена такім чынам, каб выхаванцы змаглі раскрыць свой творчы патэнцыял падчас правядзення віктарын і конкурсаў, адправіцца на экскурсіі і ў паходы па гістарычных мясцінах малой радзімы, паклапаціцца пра пахаванні воінаў, загінуўшых у гады Вялікай Айчыннай вайны, стаць актыўнымі ўдзельнікамі фізкультурна-аздараўленчых і спартыўна-масавых мерапрыемстваў.
Кожны дзень у лагеры быў не падобны на другі. Так, у першы дзень знаёмстваў хлопчыкі і дзяўчынкі падчас інтэрактыўнай гульні “Ты мой сябар, я твой сябар” падаравалі адзно аднаму цудадзейныя “кампліменты дружбы”, якія самі прыдумалі і стварылі. Найбольшую колькасць “кампліментаў” атрымала камандзір атрада Даша Жарко. Дзяўчынка вельмі хвалявалася, каб кожны быў задаволены гульнёй, і сама нястомна малявала і малявала прыгожыя і смешныя, жартаўлівыя і незвычайныя “кампліменты” для малодшых сяброў.
Дзень духоўнасці прайшоў пад дэвізам “Ствараем дабрыню на карысць тым, хто побач”. Выхаванцы лагера наведалі храм Казанскай іконы Божай Маці ў нашай вёсцы. І хоць многія дзеці не першы раз прыйшлі ў царкву, аповед пра гісторыю стварэння храма слухалі з вялікай увагай. Вучням паказалі іконы, якія ахвяравалі вернікі. Цікава было даведацца, што ікона Мікалая Цудатворца з’явілася тут у 1948 годзе, а ікона “Тайная вячэра” прывезена нашымі аднавяскоўцамі з Аўстраліі. Прыцягнула ўвагу дзяцей ікона “Цудадзейнае памнажэнне хлябоў”, створаная былым настаўнікам нашай школы Іванам Клімко і ахвяраваная ў храм у 2010 годзе.
Пасля экскурсіі дзеці працавалі на тэрыторыі, звяртаючы сваю працу на карысць вернікаў. Гэта вельмі важна для дзяцей – не толькі разважаць пра дабрыню і міласэрнасць, але і сваімі рукамі ствараць шчасце для другіх людзей. Удзячнасць вернікаў і радасныя ўсмешкі дзяцей – ці ж гэта не шчасце?
Вясеннія канікулы толькі пачаліся, і яшчэ наперадзе шмат цікавага і карыснага. А самае галоўнае – гэта шчаслівыя дзеці, бы тыя званочкі дабрыні, якая ствараецца самімі дзецьмі на карысць тых, хто вакол іх.
Марына СЯВЕЦ,
дырэктар аздараўленчага лагера “Званочкі дабрыні”
Нягневіцкай сярэдняй школы
Навагрудскага раёна
Предложить публикацию