Даволі часта ў дарослых узнікае пытанне чым заняць дзіця, каб пераключыць яго ўвагу з тэлевізара, камп’ютара, тэлефона. З гэтай задачай выхавальнікам ясляў-сада № 8 Смаргоні дапамог справіцца шашачны турнір.
Спачатку навучальнага года педагогі паставілі перад сабой мэту: пазнаёміць і навучыць выхаванцаў гульні ў шашкі, прыцягнуць да сумеснага навучання бацькоў, якія адгукнуліся на прапанову і арганізавалі гульні дома ў вольны час.
Вучылі ў гульнявой і займальнай форме, чаргавалі элементы тэарэтычнай і практычнай навізны з гульнявымі і спаборніцкімі навыкамі. У кожнай гульні ў шашкі звярталі ўвагу дзяцей на думку пра тое, што дасягненне спартыўнага поспеху магчыма пры наяўнасці настойлівасці і працавітасці, штодзённых трэніровак.
У лютым, у рамках правядзення абласных і рэспубліканскіх спартыўных мерапрыемстваў па шашках і шахматах у Беларусі, на базе ясляў-сада № 8 Смаргоні быў праведзены шашачны турнір “Чорныя і белыя” сярод выхаванцаў старшай групы № 11. Турнір праходзіў у некалькі этапаў. На першым этапе спаборніцтваў прынялі ўдзел усе жадаючыя, у другі тур прайшлі пераможцы, а ў фінале змагаліся толькі самыя моцныя. У парных спаборніцтвах паказалі свае ўменні і здольнасці як хлопчыкі, так і дзяўчынкі. Кожнаму дзіцяці давялося адчуць спаборніцкі дух.
Па завяршэнні турніру актыўныя ўдзельнікі былі ўзнагароджаны падзякамі за старанні і імкненне стаць пераможцам.
Валянціна ЖУК,
выхавальнік дашкольнай адукацыі
ясляў-сада № 8 Смаргоні
Предложить публикацию