Значнай падзеяй для сярэдняй школы № 4 Ваўкавыска стала перамога ў міжнародным конкурсе-гульні “Школа Рыбакоў Фонду – 2021” для дзяцей і дарослых, якія хочуць развіваць сваю ўстанову адукацыі.
Паўдзельнічаць у конкусе параіла намеснік дырэктара школы Валянціна Фёдараўна Карась. Менавіта яна прапанавала нам стаць адным цэлым для дасягнення агульнай мэты: зрабіць сваю школу месцам, дзе будуць рэалізоўвацца самыя цікавыя ідэі, дзе будзе важны кожны.
Кожны член каманды атрымліваў заданні праз чат-бот, за іх выкананне каманда набірала балы. Цікавыя заданні на самапракачку, многія – у сацсетках, стромкія вечарынкі, карысныя знаёмствы, самапіяр, прызы-мары… Гэтая гульня стала дзіўным падарожжам, дзякуючы якому мы пачалі ствараць супольнасць, выконваючы “карысныя” заданні.
Перамагчы ў конкурсе можна было толькі камандай, у якой ёсць вучань (крэатыўная вучаніца 11-га класа Елізавета Захарка), таленавітыя педагогі (Валянціна Фёдараўна Карась, Міхаіл Алегавіч Аганоўскі, Віталій Аляксандравіч Лебядзевіч), адказны прадстаўнік сям’і (Юлія Багданаўна Сяргей), мэтанакіраваны выпускнік (Наталля Міхайлаўна Голуб), партнёр (Крысціна Іосіфаўна Яроцкая) і прадстаўнік адміністрацыі адукацыйнай арганізацыі (Іна Міхайлаўна Краўчанка).
Першым заданнем быў старт-чэлендж “Збіраем каманду”. Мы павінны былі расказаць постам у сацыяльных сетках пра нашу каманду: хто ўдзельнікі, што нас аб’ядноўвае і чаму мы ў гульні. Кожнага з членаў каманды чакала і індывідуальнае заданне: расказаць пра сябе, пра свае захапленні і абавязкова выкласці пост на сваёй старонцы ў сацыяльных сетках. Наступныя заданні ў конкурсе – “Фарміруем школьную супольнасць” і “Прыцягваем грошы на развіццё”, справіўшыся з якімі мы апынуліся ў “Мега-Чэленджы”, дзе расказалі пра самую запамінальную падзею ў нашай школе – конкурс “Самы дружны клас”, які згуртаваў не толькі вучняў, але настаўнікаў і бацькоў.
Што ж у выніку? У намінацыі “Педагог” Валянціна Фёдараўна Карась удастоена галоўнага грашовага прыза, які будзе накіраваны на развіццё школы. Хацелася б адзначыць, што ў мега-фінал выйшла пяць педагогаў. Сярод іх – адзіны педагог Рэспублікі Беларусь, з Ваўкавыска. А якія прызы? Гэта падпіскі, кнігі, прэзентацыі, круты мерч, падарункі ад партнёраў, якія мы маглі выбраць самі за заробленыя балы.
Але самы галоўны прыз – гэта наша класная каманда і супольнасць, якая дае ўдзельнікам нашмат больш. Падчас удзелу ў конкурсе да нас прыйшло разуменне таго, наколькі важна ўмець працаваць у камандзе. Гульня дапамагла нам зразумець, што каманда – той сегмент, у якім можна максімальна раскрыць патэнцыял і творчыя здольнасці кожнага з яе членаў, а наша школа – гэта месца, дзе вучацца і працуюць аднадумцы, нараджаюцца і ўвасабляюцца ў жыццё смелыя праекты, знаходзяць падтрымку самыя арыгінальныя ідэі.
Дар’я ПАБУДЗЕЙ,
настаўнік рускай мовы і літаратуры
сярэдняй школы № 4 Ваўкавыска
Предложить публикацию