- МІНШЧЫНА, Рэгiёны

Бяспека дзяцей – агульны клопат

 

Пачатак летняга перыяду і школьных канікул прыносіць вялікую занепакоенасць пра бяспеку і жыццё нашых дзяцей, якія часцей застаюцца без нагляду дарослых.

Адной з самых вялікіх праблем з’яўляецца дзіцячы дарожна-транспартны траўматызм. Як паказвае статыстыка, для дзяцей-пешаходаў характэрныя тыя ж парушэнні правіл дарожнага руху, што і для дарослых. Найбольш распаўсюджаныя – пераход вуліцы ў неналежным месцы, нечаканае з’яўленне на праезнай частцы з-за транспартных сродкаў і збудаванняў.

Менавіта з-за таго, што больш за палову ўсіх ДТЗ з удзелам дзяцей прыпадае на летні перыяд, на час школьных канікул, інспектары ДАІ Мінскага раёна сумесна з установамі адукацыі правялі Адзіны дзень бяспекі дарожнага руху пад дэвізам “Увага – дзеці!”, накіраваны на прафілактыку дзіцячага дарожна-транспартнага траўматызму. Настаўнікі ў гульнявой форме гаварылі з дзецьмі пра правілы дарожнага руху, расказвалі, як правільна паводзіць сябе паблізу праезнай часткі, а таксама нагадвалі пра тое, каб яны не гулялі і не каталіся на веласіпедах па дарогах.

Існуе праблема небяспечнай перавозкі дзяцей у транспартных сродках. Напрыклад, многія бацькі часта грэбуюць выкарыстаннем дзіцячых крэслаў, спасылацца на адсутнасць грошай на куплю дзіцячых прылад бяспекі. Навучэнцы старшай школы распрацавалі буклеты пра важнасць выкарыстання дзіцячых крэслаў, якія ўручалі жыхарам Бараўлянскага рэгіёну. Вучні заклікалі ўсіх бацькоў, якія перавозяць дзяцей у транспартных сродках, абсталяваць аўтамабілі дзіцячымі прыладамі для ўтрымання і быць як мага больш уважлівымі да сваіх сыноў і дачок.

У рамках прафілактыкі дзіцячага дарожна-транспартнага траўматызму Упраўленне па адукацыі Мінскага раёна сумесна з Бараўлянскай сярэдняй школай № 2 арганізавалі раённы конкурс для навучэнцаў і педагогаў “Пешаход на пераход. Вадзіцелю ўвага”. Удзел у конкурсе можна прыняць у трох намінацыях: “Дыстанцыйны ўсенавуч па бяспецы жыццядзейнасці”, “Анімацыйныя відэаролікі па прафілактыцы дзіцячага траўматызму”, “Метадычныя распрацоўкі па прафілактыцы дзіцячага траўматызму”.

Бяспека дзяцей – задача ўсяго нашага грамадства. Таму ў гэтым працэсе самы актыўны ўдзел таксама павінны прымаць усе: самі навучэнцы, бацькі, настаўнікі. Только сумеснымі намаганнямі нам удасца зрабіць летні адпачынак для нашых дзяцей не толькі насычаным, але і бяспечным і карысным.

Іван КАЛКОЎСКІ,
намеснік дырэктара па вучэбнай рабоце
Бараўлянскай сярэдняй школы № 2

Поделиться ссылкой:

Пакінуць адказ