У Дзень маці ў адрас любімых матуль гучыць шмат цёплых і добрых слоў. Не засталіся ў баку ад гэтага і вучні Пелішчанскай сярэдняй школы Камянецкага раёна.
З нагоды свята ва ўстанове была арганізавана тэматычная выстава фотаздымкаў, малюнкаў і творчых вырабаў. Падчас яе чыталі вершы, выконвалі песні. На святочных перапынках таксама гучалі песні пра маму, дружбу і каханне. Дзеці глядзелі вядомыя мультфільмы пра маманцяня і дамавога Кузю.
Вучні 5–8 класаў пісалі мамам адкрытыя лісты, каб усе 
даведаліся, якія яны цудоўныя. Пяцікласнікі не шкадавалі ў адрас мам прыгожых прыметнікаў: прыгожая, добрая, мілая, працавітая, пяшчотная, любімая, сціплая, шчодрая… Шасцікласнікі параўноўвалі мам з анёлам, расказвалі пра іх кулінарныя здольнасці і прафесійную дзейнасць. Сямікласнікі прызнаваліся ў вялікай любові да сваіх матуль і дарылі ім шмат удзячных слоў. Васьмікласнікі разважалі пра ролю мам.
Настаўнік беларускай мовы і літаратуры Л.І.Лойкуц напісала верш “Прыезд да маці”:
Усміхнуліся пяшчотна вусны.
Затрымцелі слёзы на вачах.
Гэта мой прыезд цябе ўзрушыў,
Бо не папярэдзіла, прабач.
Схамянулася, прыціснула штосілы,
І так лёгка стала на душы…
Бачу: не чакала, я ж не пазваніла.
Мой прыезд знянацку, як заўжды.
Глянула, як быццам папрасіла:
“Як жывеш, дачушка, раскажы?”
Позіркам прысесці запрасіла,
А ў вачах трывога ўсё дрыжыць.
Як жыву? Па-рознаму бывае,
Лёс не надта песціць нас усіх.
Дзеці? Добра, мама, падрастаюць.
Што? Вячэраць? Не, не трэба, не нясі.
Пасядзі са мною побач ціха,
Самы родны сэрцу чалавек,
Патрымаемся за рукі крыху,
Бо калі ўбачымся яшчэ.
Прытулюся я да маці моўчкі,
Сэрца ўсё раскажа за мяне.
Беражы сябе ты, мама, толькі,
А мяне, не бойся, шчасце не міне.
Беражыце сваіх матуль! Даражыце імі! Не засмучайце іх, часцей гаварыце ім добрыя словы. Мама кожнага – лепшая.
Наталля ПЯТРЭНКА,
настаўнік рускай мовы і літаратуры
Пелішчанскай сярэдняй школы
Камянецкага раёна
Предложить публикацию