15 лютага ў сярэдняй школе № 1 Смаргоні адбылося ўрачыстае адкрыццё дэкады вайсковай славы і памяці “Мы ганарымся Айчынай сваёй”, прысвечанай вываду савецкіх войскаў з Афганістана.
Навучэнцы сабраліся, каб успомніць тых людзей, якіх называюць сапраўднымі мужчынамі, з якіх цяперашнія хлапчукі могуць браць прыклад. Пад гукі метранома навучэнцы ўшанавалі хвілінай маўчання памяць салдат, якія крочылі ў вечнасць, праявіўшы найвышэйшую сілу духу, самаадданасць, гераізм, выконваючы баявы абавязак.
У гэты дзень навучэнцы школы правялі флэш-моб “Дзень памяці воінаў Афгана”, у якім заклікалі берагчы мір і цаніць жыццё.
Ва ўсіх класах прайшлі тэматычныя інфармацыйныя гадзіны пад назвай “Той памятны Афган”. Навучэнцы пазнаёміліся з гісторыяй афганскай вайны, даведаліся пра прычыны яе пачатку і працягласць, пра вялікія страты савецкіх войскаў, пра нашых землякоў, якім лёс наканаваў жорсткую долю – згарэць у агні чужой вайны, якім ужо ніколі не давядзецца пераступіць парог роднай хаты.
Таксама школьнікі прачыталі вершы і лісты, якія напісалі ўдзельнікі баявых дзеянняў у Афганістане.
Група навучэнцаў усклала кветкі да памятнага знака “Рэха вайны”. Ён прысвечаны воінам-інтэрнацыяналістам Пятру Балышу, Уладзіміру Рычагову і Віктару Саломчанку, выхадцам і жыхарам Смаргонскага раёна, якія загінулі пры выкананні службовага абавязку.
Таццяна ІСТРАЦЬКОВА,
настаўнік рускай мовы і літаратуры
сярэдняй школы № 1 Смаргоні
Предложить публикацию