У Раздзялавіцкай сярэдняй школе Ганцавіцкага раёна адбылася калектыўная творчая справа “Вялікай Перамозе прысвячаецца”.
Сёлета падрыхтоўка да чарговай гадавіны Перамогі пачалася з патрыятычнай акцыі “Беларусь памятае”. Падчас пошукавай работы школьны музейны пакой папоўніўся новымі звесткамі пра ваенныя біяграфіі ветэранаў і загінуўшых землякоў. На аснове сабраных матэрыялаў праводзяцца ўрокі мужнасці.
Актывісты грамадскіх аб’яднанняў і аб’яднанняў па інтарэсах прынялі актыўны ўдзел у раённым чэленджы “Пакуль мы памятаем, у нас ёсць будучыня” і конкурсе чытальнікаў “Жывая класіка”. Падчас акцый “Помнік” і “Кветкі ля абеліска” былі добраўпарадкаваны месцы воінскіх пахаванняў.
Школьнікі наведалі гістарычна-культурны комплекс “Лінія Сталіна”, дзе акунуліся ў атмасферу ваенных падзей, пабывалі на абарончых агнявых кропках і адчулі сябе ў ролі чырвонаармейцаў, азнаёміліся з баявой тэхнікай ваенных і пасляваенных гадоў.
Галоўнай падзеяй, якую чакала ўся школа, стаў арт-фестываль “Дарогамі вайны”. На ім гучалі вершы, песні і ўрыўкі з ваеннай прозы, ладзіліся тэатральныя пастаноўкі.
Вучні аддалі дань павагі ветэранам і загінуўшым воінам, ушанавалі памяць ахвяр сярод мірнага насельніцтва і ў чарговы раз сказалі ім дзякуй за мірнае жыццё і шчаслівае дзяцінства на нашай зямлі.
Нона ВАЛУЕВІЧ,
намеснік дырэктара па выхаваўчай рабоце
Раздзялавіцкай сярэдняй школы
Ганцавіцкага раёна
Предложить публикацию