У конкурсе «Сям’я года», што прайшоў на Смаргоншчыне, за званне лепшай спаборнічалі чатыры шматдзетныя сям’і раёна: Кухлей, Ломаць, Баран і Смушко.
Гледачы з цікавасцю глядзелі конкурсныя заданні. У намінацыі «Радавод» кожны з удзельнікаў пастараўся ў арыгінальнай форме распавесці пра сваю сям’ю, яе вытокі. Сувязь з грамадствам і краінай прасочвалася ў намінацыі «Мая сям’я – мая краіна».
Усе канкурсанты прадставілі на суд журы і гледачоў выставу ўласных вырабаў і захапленняў: фатаграфіі, малюнкі, шэдэўры, вырабленыя кручком, з лазы, вышытыя карціны, выпечку.
Па выніках конкурсу перамагла сям’я Кухлей. Другое месца заняла сям’я Ломаць, трэцяе падзялілі Смушко і Баран.
На раённым мерапрыемстве таксама адбылося ўручэнне ордэнаў Маці Кацярыне Васюта і Вользе Кухлей. Смаргонскае раённае аддзяленне грамадскага аб’яднання «Беларускі дзіцячы фонд» набыло для мерапрыемства салодкія прызы – торты ўсім удзельнікам конкурсу і маці, узнагароджаным ордэнамі.
Ларыса ТАТАРЫНАВА,
дырэктар раённага аддзялення
РГА «Беларускі дзіцячы фонд»
Предложить публикацию