Напярэдаднi велiкодных свят вучні 3 “Г” класа сярэдняй школы № 3 Iванава адправiлi святочныя паштоўкi трусу Олi, якi пражывае ў Германіі.
Лiчыцца, што менавiта Велiкодны трус прыносiць перад святам i хавае ў патаемных месцах шакаладныя яйкi, якiя дзецi з задавальненнем шукаюць у Велiкодную нядзелю. А яшчэ трус абавязкова адказвае на лiсты дзяцей з усяго свету, расказвае пра вясну, сваю сям’ю, падрыхтоўку да свята.
Такi лiст-адказ атрымалi i трэцякласнiкi за некалькi дзён да Вялiкадня. Трус Олi з задавальненнем раскрыў сакрэт свайго добрага здароўя i настрою: яго жонка Лоцi гатуе яму маркоўны суп па рэцэпце, якi перадаецца з пакалення ў пакаленне, i сакрэтным iнгрэдыентам якога з’яўляецца крэс-салата.
Олi выслаў крыху насення iванаўскiм школьнiкам. Хлопчыкi i дзяўчынкi пасеялi яго ў кантэйнеры i з нецярпеннем чакаюць першы ўраджай.
Велiкодны трус Олi перадаў усiм добрыя пажаданнi i папрасiў напiсаць яму ў наступным годзе.
Святлана СЕВЯРЫН,
настаўнiк англiйскай мовы
сярэдняй школы № 3 Iванава