Летам дзеці больш часу праводзяць на вуліцы. У сувязі з гэтым нашымі педагогамі створаны тэматычныя пляцоўкі, якія дазваляюць максімальна насычаць пазнавальную дзейнасць дзяцей на адкрытым паветры.
Для развіцця і падтрымання ў дзяцей цікавасці да даследчай дзейнасці з гэтага года ў нашым дашкольным цэнтры пачала функцыянаваць тэматычная пляцоўка “Марскі круіз”.
Падчас гульні група выхаванцаў ператвараецца ў экіпаж падарожнікаў, дзе ў кожнага свая роля: капітан, матросы, боцман. Трохі фантазіі, і дзеці адпраўляюцца ў займальнае падарожжа на караблі па марах і акіянах, знаёмяцца з іх насельнікамі.
Выхавальнікі дашкольнай адукацыі Жанна Раманаўна Кузняцова і Валянціна Напалеонаўна Казлоўская распрацавалі маршруты, якія аформілі ў выглядзе маляўнічых карт, дзе адзначаны прыпынкі. На кожным прыпынку дзеці выконваюць заданні (адгадваюць загадкі, вырашаюць задачы на логіку, збіраюць пазлы і інш.). Нашым маленькім маракам даводзіцца спрытна кіраваць караблём, каб не сутыкнуцца з айсбергам і справіцца з бурай.
Прыемна ўсведамляць, што дзецям гэта падабаецца і яны з задавальненнем прымаюць удзел у такіх тэматычных мерапрыемствах.
Таццяна ХІНЕВІЧ,
намеснік загадчыка па асноўнай дзейнасці
дашкольнага цэнтра развіцця дзіцяці № 1 Астраўца
Предложить публикацию