У цяперашні час мы назіраем, што дзеці вельмі мала ведаюць пра кнігі, у іх зніжана культура абыходжання з кнігай, а свет дзіцяці занялі гаджэты і камп’ютары. Таму выхавальнікі спецыяльнай групы для дзяцей з цяжкімі парушэннямі маўлення Нягневіцкага ясляў-сада вырашылі пагаварыць з дзецьмі пра кнігу як пра крыніцу ведаў і цікавай інфармацыі.
Для дзетак былі падрыхтаваны тэматычныя выставы кніг “Разумныя кнігі” (энцыклапедыі) і “Кнігі для самых маленькіх”. Малыя з задавальненнем разглядалі кнігі, абмяркоўвалі ілюстрацыі, дзяліліся ўражаннямі са сваімі сябрамі, слухалі вершы і апавяданні, якія чыталі для іх выхавальнікі, адгадвалі загадкі, гулялі ў казачныя пазлы, дыдактычную гульню “Раскажы казку”. Падчас рашэння праблемнай сітуацыі “Як сябе адчувае парваная кніга?” дзеці засвоілі правілы абыходжання з кнігай: браць яе чыстымі рукамі, перагортваць асцярожна старонкі, не рваць і не камячыць, а таксама самастойна зрабілі закладкі для кніг.
Выхаванцы пераказвалі знаёмыя казкі па самаробных кніжках, якія з фетру зрабілі іх бацькі, размясціўшы шмат элементаў для развіцця дробнай маторыкі – гузікі, кнопкі, здымныя дэталі, замацаваныя на тэкстыльную ліпучку.
Для бацькоў у бацькоўскім кутку выхавальнікі размясцілі інфармацыю “Мульцік або кніжка, што важней дзецям”, падрыхтавалі рэкамендацыі “Кнігі ў вашым доме”. Ініцыятыўныя таты і матулі паўдзельнічалі ў фотавыставе “Чытаем разам з мамай”.
Мы спадзяёмся, што праведзеныя мерапрыемствы садзейнічалі праяўленню ў дзяцей ўстойлівага інтарэсу да літаратуры, разуменню бацькамі таго, што чытанне было і застаецца асноўным сродкам далучэння дзяцей да культуры, што неабходна чытаць дзіцям, чытаць разам з дзецьмі, бо ў кнігах ўтоена шмат мудрасці, якая абавязкова спатрэбіцца ў жыцці.
Святлана МІХАЛКЕВІЧ,
выхавальнік дашкольнай адукацыі
Нягневіцкага ясляў-сада
Навагрудскага раёна
Предложить публикацию