Экскурсам у гісторыю сярэднявечча стала падарожжа выхаванцаў аздараўленчага лагера Любчанскай сярэдняй школы Навагрудскага раёна ў Мірскі замак – адзін з самых галоўных замкаў Беларусі, які з’яўляецца сусветнай спадчынай ЮНЕСКА.
Экскурсія ў Мірскі замак для дзяцей – гэта займальная прагулка, дзе на іх вачах ажывае гісторыя, раскрываючы падрабязнасці жыццёвагага ўкладу даўно мінулых гадоў. Школьнікам запомняцца вузкія высокія вінтавыя лесвіцы, скляпеністыя столі, раскошныя залы, па-майстэрску адноўленыя
апартаменты, не менш цікавыя гаспадарчыя памяшканні і шырокі ўнутраны двор, дзе, здаецца, яшчэ можна пачуць рытмічны цокат капытоў па брукаванай маставой.
На развітанне хлопчыкі і дзяўчынкі дакрануліся рукой да сцяны замка, якая захавалася ў першапачатковым выглядзе з ХVІ стагоддзя, і загадалі жаданні, бо, па мясцовым павер’і, яны павінны абавязкова збыцца.
У скарбонку летніх дзіцячых уражанняў дадалося яшчэ адно незабыўнае – яскравыя ўспаміны пра велічны Мірскі замак, які пакінуў ва ўсіх удзельнікаў экскурсіі пачуццё гонару за багатую шматвяковую гісторыю нашай радзімы.
Алена ШАЙБАК,
настаўнік гісторыі
Любчанскай сярэдняй школы
Навагрудскага раёна
Предложить публикацию