Навучэнцы Асавецкага ясляў-сада – сярэдняй школы Мазырскага раёна Антон Андрусевіч, Ганна Андрусевіч, Юлія Троц, Аляксандр Міхневіч і Карына Дамбоўская ўзнагароджаны дыпломамі І, ІІ і ІІІ ступеняў за ўдзел у дыстанцыйнай алімпіядзе “Падабайкі роднай мове 2021/2022” сярод вучняў 6–8-х класаў.
Перамога ў алімпіядзе з’яўляецца вынікам высокага ўзроўню ведаў па беларускай мове і літаратуры. Вялікая заслуга ў гэтым належыць настаўніку роднай мовы Галіне Шкробат. Як прызнаюцца вучні, удзел у алімпіядзе не толькі стымулюе іх спазнаваць нешта новае, але вучыць самастойнасці, арганізаванасці, дысцыплінаванасці.
Інтэрнэт-платформа “Падабайкі роднай мове” змяшчае практычныя заданні, гульні, алімпіяды, заданні па ЦТ, а таксама шмат карыснай інфармацыі пра ўнікальную лексіку, літаратуру і культуру нашых продкаў. Алімпіядныя заданні былі як тэматычныя, так і змешанага тыпу. Кожная алімпіяда мела адметную назву: “Вераснёўскія жарынкі”, “Гука-літарныя пацешкі”, “Лексічныя пацешкі”, “Марфалагічная вясёлка”, “Кошык пунктуацыі” і г.д.
Каб паспяхова ўдзельнічаць у алімпіядным руху, навучэнцы павінны валодаць унутранай матывацыяй, здольнасцю засвойваць вялікі аб’ём інфармацыі, вялікі слоўнікавы запас, уменнем рабіць вынікі, творчым мысленнем, уменнем разважаць, настойлівасцю ў выкананні задання, упэўненасцю ў сваіх здольнасцях.
Вольга НЕСЦЯРЭНЯ,
кіраўнік метадычнага аб’яднання настаўнікаў
Асавецкага ясляў-сада – сярэдняй школы Мазырскага раёна
Предложить публикацию