Напярэдадні новага навучальнага года ўстановы адукацыі Бабруйска папоўніліся маладымі педагогамі. Усяго да працы ўжо прыступіў 101 малады спецыяліст.
У навучальных установах горада паўсюдна робяць стаўку на моладзь. Для хутчэйшага жыццяўладкавання пачынаючых настаўнікаў прадугледжваецца шэраг стымулюючых выплат. Сярод прыярытэтных задач – дапамога ў прафесійным станаўленні. Для маладых спецыялістаў створаны аптымальны рэжым працы і адпачынку з улікам неабходнасці наведвання вучэбна-метадычнага кабінета, заняткаў вопытных педагагічных работнікаў.
– Стараемся дапамагчы пачынаючым настаўнікам замацавацца на працоўным месцы, развіць свае здольнасці, дасягнуць пэўных вынікаў у навучанні і выхаванні. Для забеспячэння іх працоўнай і сацыяльнай адаптацыі арганізавана работа школы маладога настаўніка, кансультацыйных пунктаў у рамках гарадской метадычнай сеткі. У кожнай установе адукацыі развіты інстытут настаўніцтва. Акрамя таго, маладыя спецыялісты актыўна ўдзельнічаюць у розных мерапрыемствах, фестывалях і конкурсах, – расказала начальнік упраўлення па адукацыі Бабруйскага гарвыканкама Алена Лісіца.
Падобныя падыходы дазваляюць маладым бабруйскім педагогам лёгка спраўляцца з усімі складанасцямі і праблемамі ў сваёй практычнай дзейнасці. Адметна, што значная падтрымка маладых спецыялістаў станоўча ўплывае таксама на іх замацаванне. Апошнім часам 64 % з іх стабільна застаюцца ў Бабруйску.
Ганна СІНЬКЕВІЧ,
фота прадастаўлена аддзелам па адукацыі
Бабруйскага гарвыканкама
Предложить публикацию