- ГРОДЗЕНШЧЫНА, Рэгiёны

Дыялогавая пляцоўка: гаворым пра будучыню

 

У сярэдняй школе № 7 Смаргоні ў рамках работы рэспубліканскай дыялогавай пляцоўкі навучэнцы 10–11 класаў разам з настаўнікам гісторыі і грамадазнаўства Г.П.Пешкур разважалі пра будучыню нашай краіны.

Усе пытанні, прапанаваныя да разгляду, выклікалі ў старшакласнікаў непадробную цікавасць.

Гаворачы пра шляхі партыйнага будаўніцтва і механізмы пераходу да змяшанай выбарчай сістэмы, удзельнікі прапанавалі стварыць умовы для павышэння ролі палітычных партый у жыцці грамадства, а таксама ўнесці адпаведныя змены ў выбарчае заканадаўства.

Наконт смяротнага пакарання старшакласнікі аднагалосна выказаліся за паступовы сыход ад яго прызначэння. На думку вучняў, такое рашэнне абавязкова павысіць аўтарытэт дзяржавы на міжнароднай арэне.

Адносна права ўласнасці на зямлю старшакласнікі пажадалі больш актыўна і бесперашкодна надзяляць ім тых фермераў, якія ўжо зарэкамендавалі сябе як руплівыя гаспадары. Рашэнне такіх зямельных пытанняў яны лічаць неабходным перадаць у паўнамоцтвы мясцовых органаў улады.

Парадак фарміравання і паўнамоцтваў органаў тэрытарыяльнага самакіравання, пераразмеркаванне функцый выканкамаў і мясцовых Саветаў дэпутатаў выклікалі найбольшыя спрэчкі. Аднак падчас дыялогу вучні прыйшлі да адзінага рашэння – надзяліць найбольшымі паўнамоцтвамі Саветы базавага тэрытарыяльнага ўзроўню (гарадоў абласнога падпарадкавання і раённых) і першаснага тэрытарыяльнага ўзроўню (сельскіх, пасялковых, гарадоў раённага падпарадкавання), а таксама пашырыць дзейнасць пасялковых старастаў і па магчымасці аплачваць гэтую пасаду.

Не засталося па-за ўвагай і пытанне змены адміністрацыйна-тэрытарыяльнага ўладкавання рэспублікі. Нашы старшакласнікі лічаць, што трэба захаваць былую колькасць абласцей, а вось малыя раёны можна далучыць да больш буйных або па магчымасці аб’яднаць іх.

“Маладосць шчаслівая тым, што ў яе ёсць будучыня”, – пісаў рускі класік Мікалай Васільевіч Гогаль. Хочацца верыць, што будучыня нашых дзяцей будзе светлай і радаснай. Бо ўжо цяпер яны самі спрабуюць зрабіць яе такой.

Марыя ГОВІЧ,
настаўнік рускай мовы і літаратуры
сярэдняй школы № 7 Смаргоні

 

Поделиться ссылкой:

0

Добавить комментарий