- ГОМЕЛЬШЧЫНА, Рэгiёны

Дыялог пра духоўнае і маральнае ў ГДУ імя Ф.Скарыны  

 

“Чалавеку неабходна выконваць законы не толькі фізічныя, але і духоўныя”, – такую думку выказаў старшыня Сінадальнага аддзела па супрацоўніцтве са свецкімі ўстановамі адукацыі протаіерэй Фёдар Поўны ў адкрытым дыялогу з калектывам Гомельскага дзяржаўнага ўніверсітэта імя Францыска Скарыны.

Падчас свайго візіту ў найбуйнейшы навукова-адукацыйны цэнтр рэгіёна настаяцель прыхода храма Усіх Святых горада Мінска протаіерэй Фёдар Поўны падкрэсліў, што яму, ураджэнцу Гомельшчыны, асабліва прыемна праводзіць падобную сустрэчу на роднай зямлі. Да ўсяго іншага, у Гомельскім дзяржуніверсітэце на базе гістарычнага факультэта ўжо шмат гадоў паспяхова функцыянуе грамадская кафедра хрысціянскай культуры.

Прысутныя з цікавасцю слухалі ўспаміны ганаровага госця пра яго дзяцінства, юнацкія і студэнцкія гады, службу ў арміі і працу не толькі ў Беларусі, але і за мяжой.

Студэнты і выкладчыкі задавалі пытанні пра ролю царквы ў жыцці сучаснага грамадства, узаемаадносіны з іншымі канфесіямі, захаванне царкоўнаславянскай мовы.

– Я жадаю вам усім моцнага здароўя і шчырасці ў адносінах да сябе, да Бога, – сказаў напрыканцы сустрэчы протаіерэй Фёдар Поўны, а таксама прэзентаваў усім прысутным велікодныя паштоўкі храма Усіх Святых горада Мінска.

Рэктар ГДУ Сяргей Хахомаў падзякаваў госцю за магчымасць наведаць універсітэт і паразмаўляць з калектывам і запрасіў протаіерэя ў выставачную залу, дзе размешчана духоўна-асветніцкая фотавыстава “Вочы ў вочы”.

 

Андрэй ВЯЛІКІ
Фота аўтара

 

Поделиться ссылкой:

0

Добавить комментарий