Сцэнарый святочнага мерапрыемства да Дня маці
Ала ЛУБЕШКА,
музычны кіраўнік
ДУА “Дзіцячы сад № 83 г. Гродна”
Мэты:
– выхоўваць павагу да маці;
– развіваць эстэтычны густ, адчуванне прыгожага ў паэзіі, музыцы, пачуццях;
– стварыць святочны настрой.
Матэрыял і абсталяванне: ноты, фартэпіяна, рабіна, маліна (муляж), кошыкі, музычны цэнтр, флэшка з музыкай, дудка, падарункі для мам.
Папярэдняя работа: гутарка пра свята, развучванне вершаў, танца і песень.
Ход забавы
Зала мае святочна ўпрыгожаны выгляд. Гучыць музыка. Дзеці ўваходзяць у залу.
Вядучы:
Сёння ў нашым садзе свята
І гасцей у нас багата,
Мы віншуем самых родных
Светлых, блізкіх і чароўных.
Дзіця:
Словы шчодрыя знайду,
І пра маму верш складу.
Яшчэ песню праспяваю
Слухай, мама дарагая!
Песня “Песенька пра маму”
Вядучы: А цяпер, дзеці, паслухайце ўважліва загадкі:
– У яе яно самае чулае і клапатлівае, заўсёды свеціцца любоўю.
Яно згустак сусветнага дабра, сусветнага святла. (Сэрца маці)
– Стаіць у лесе дрэўца,
Ад ветру лёгка гнецца,
А гронкі ягадак гараць,
І снегіры да іх ляцяць. (Рабіна)
– Маленькая паненачка
Схавалася ў цянёк.
Чырвоная сукеначка,
А беленькі пянёк. (Маліна)
Вядучы: А цяпер мы з вамі пагуляем.
Гульня: “Збяром рабіну і маліну для матулі”.
Дзеці дзеляцца на каманды і збіраюць у кошыкі тое, што загадвае вядучы (адна каманда маліну, а другая рабіну). Перамагае тая каманда, якая хутчэй збярэ тое, што ёй сказалі.
Вядучы: Матулечка – даражэйшы на свеце чалавек. Нараджэннем сваім, разуменнем, мы абавязаны вядома ёй.
З цёплымі пажаданнямі для вас выступяць дзеці з прыгожымі вершамі.
Дзіця:
Свеціць, як сонца,
Ад самай калыскі
Вобраз любімы,
Родны і блізкі.
Маміна імя
Самае лепшае,
Маміна слова
Найдаражэйшае.
Мама! Матуля! –
Чароўнае слова
Песняй ласкавай
Гучыць на ўсіх мовах.
(“Дарагое імя” Мікола Хведаровіч)
Дзіця:
Ад калыскі-люлькі ўтульнай
Дзень і ноч – па гэты час –
Наша мілая матулька
Клапацілася пра нас.
Малаком усмак паіла,
Укладала песняй спаць,
Роднай моваю вучыла
Словы добрыя казаць.
(“Наша матулька” Ніл Гілевіч)
Дзіця:
Мамачкі любімыя
Рады мы вас віншаваць,
І цяпер на хуткі танец
Будзем запрашаць!
“Танец з мамамі”.
Дзіця:
Цеплынёй атуліць
Сонейка зямлю.
Мілая матуля,
Я цябе люблю.
Мне з табой утульна,
І спяваю я:
“Мамачка,
Матуля,
Любая мая”.
Песня «Матуля».
Вядучы: Есць яшчэ ў мяне загадка для вас.
Не палачка, не люлечка,
А што ж гэта?
Дзеці: Дудачка.
Вядучы: Запрашайце сваіх матуль пагуляць з намі ў гульню “Дудка”.
Гульня “Дудка”
Дзеці і дарослыя стаяць па крузе, спяваюць і адначасова перадаюць дудку адно аднаму.
Гэта дудка не прастая –
Ад усіх яна ўцякае.
Каму ў рукі пападзе.
Той у круг скакаць ідзе.
Дзіця ці дарослы з дудкай выходзіць на цэнтр круга і выконвае танцавальныя рухі, усе астатнія дзеці і дарослыя пляскаюць у далоні.
Дзіця:
Сёння свята нашых мам.
Прыйшлі матулі ў госці к нам.
Мы ўсім садам іх чакалі,
Падарункі рыхтавалі.
Кожнай маме – падарунак,
Кожнай маме – пацалунак.
Дзіця:
Павіншуем жа сваіх
Мам любімых дарагіх.
Дружна песню заспяваем,
Дружна шчасця пажадаем.
Песня “Наступае свята нашых мам”.
Вядучы: Якое прыгожае свята ў нас атрымалася! I на развітанне прыміце ад дзетак падарункі, якія яны зрабілі сваімі рукамі.
Гучыць музыка, дзеці выходзяць з залы.
Предложить публикацию