“Вольны час не для забавы, а для добрай справы!” – пад такім дэвізам праходзіць лета вучняў Любчанскай сярэдняй школы Навагрудскага раёна.
Сапраўды, калі час траціцца з карысцю, чалавек адчувае неверагодную асалоду, атрымоўвае задавальненне ад жыцця, набывае многа новых ведаў.
Лета ў разгары, канікулы працягваюцца, а гэта значыць, што самы час на добрыя справы, цікавыя сустрэчы і пазітыўныя ўражанні.
Чарговую ініцыятыву прапанаваў нашым падлеткам настаяцель Свята-Ільінскай царквы ў Любчы протаіерэй Аляксандр. Дарэчы, ён часты госць у нашай установе, дапамагае добрай парадай, духоўнай падтрымкай, сваім асабістым удзелам у важных справах і пачынаннях.
На гэты раз у знак моцнай дружбы і цеснага супрацоўніцтва, а таксама з нагоды аб’яўлення 2021 года Годам народнага адзінства, узнікла ідэя пасадзіць на школьным двары алею. Настаяцель царквы падараваў нашай установе саджанцы канадскага дуба, якія атрымаў з батанічнага сада. Справа аб’яднала і дзяцей, і педагогаў. Такія моманты натхняюць нас на творчасць і адкрываюць новыя гарызонты для супрацоўніцтва і ўзаемадзеяння.
Ну а пасаджаныя дрэвы не толькі ўпрыгожаць школьную тэрыторыю, але і стануць сімвалам нашага адзінства, адданасці роднай зямлі, сваім караням, сваёй радзіме.
Вераніка АЛЯШКЕВІЧ,
дырэктар Любчанскай сярэдняй школы
Навагрудскага раёна
Предложить публикацию